Bomberi i shumëkërkuar i Napoli, Victor Osimhen, ka pranuar dëshirën për të luajtur një ditë në Premier League. Sulmuesi është ndër objektivat kryesorë të Manchester United, por dhe klubeve të tjera në Angli, dhe nuk përjashtohet që lojtari të largohet nga Napoli gjatë merkatos së verës.
Në një intervistë të fundit, Osimhen u shpreh:
“Mendoj se të luash në një nga 5 kampionatet më të mira në botë është një ndjesi fantastike për mua. Shumë njerëz konsiderojnë Premier League si ligën më të mirë dhe të fortë, por tani jam në një nga kampionatet më të mira në botë që është Serie A. Po punoj fort që të sigurohem se një ditë realizoj ëndrrën time për të luajtur në Angli, por siç e thashë, është një proces dhe dua të ruaj ritmin dhe të vazhdoj të performoj mirë.”
Sulmuesi Nigerian ka shënuar plot 19 herë në 21 ndeshje me Napolin në Serie A këtë sezon. Kujtojmë se napolitanët kryesojnë kampionatin me plot 15 pikë diferencë nga ndjekësit më të afërt, dhe sipas të gjitha gjasave, Osimhen do të shpallet për herë të parë kampion në Serie A.
Manchester United është klubi më i interesuar në shërbimet e bomberit, teksa “Djajtë e Kuq” ende nuk kanë gjetur një zëvëndësues të denjë për Cristiano Ronaldo, që u largua nga Old Trafford në janar. Anglezët gjithashtu po monitorojnë dhe Harry Kane, por mosha e Osimhen e bën atë një alternativë më të pëlqyer për trajnerin Ten Hag.
Nigeriani konsiderohet nga shumë analistë sportivë si lojtari perfekt për kampionatin anglez, duke marrë parasysh forcën e tij fizike, shpejtësinë si dhe aftësinë për të shënuar gol edhe me këmbën e dobët. Mbetet të shohim nëse destinacioni i rradhës për Osimhen do të jetë Old Trafford, apo një tjetër klub në Premier League.
