Drejtuesit e West Ham janë duke pritur për ofertën financiare të rradhës nga Arsenal, për kartonin e Declan Rice. Klubi refuzoi ofertën e dytë të “topçinjëve” për mesfushorin, e cila ishte në shifrat e 90 milionë paundëve, ndërkohë që po pret dhe përfshirjen e Manchester City në bisedime.
Sipas mediave angleze, West Ham ka bindje të plotë se Arsenal do të bëjë një tjetër ofertë për Rice, i cili vlerësohet minimalisht në shifrat e 100 milionë paundëve, nga presidenti i klubit, David Sulivan. Lajmi se Manchester City është gati të hidhet në garë ka bërë që drejtuesit e Arsenal të fokusojnë përpjekjet e tyre për të arritur një marrëveshje sa më shpejt për kartonin e anglezit.
Kjo pasi londinezët e dinë mjaft mirë se kapaciteti financiar i Manchester City mund te kthehet në një problem serioz, nëse këta të fundit vendosin të vijnë me një ofertë zyrtare. Për më shumë, Arsenal do të paguajë 70 milionë paundë për kartonin e Kai Havertz nga Chelsea. Lojtari pritet të ketë një rrogë prej minimalisht 210 mijë paundësh në javë. Gjithashtu, londinezët kërkojnë të firmosin me talentin e Ajax Jurrien Timber, ndërkohë që Romeo Lavia i Southampton është po ashtu një objektiv.
Ndërkohë Thomas Partey dhe Granit Xhaka pritet të largohen këtë verë nga klubi. Edhe nëse Arsenal përfiton shuma të kënaqshme financiare për kartonat e dy lojtarëve, kostoja e Havertz dhe Rice, nëse arrihet një marrëveshje, do të jetë shumë më e madhe.
Xhaka pritet t’i bashkohet gjermanëve të Bayer Leverkusen në rastin e afrimit të Rice, ndërkohë që për Partey ekziston interes nga disa klube në Arabinë Saudite. Interes për Partey ka dhe nga klube në Serie A. Ndërkohë tek Arsenal e ardhmja e Rob Holding dhe Kieran Tierney gjithashtu është e paqartë.
