Sipas raportimeve në Itali, Jose Mourinho është gati të ndëshkojë 5 lojtarë nga ekipi i tij, pas humbjes turpëruese ndaj Bodo/Glimt në Europa Conference League. Lojtarët në fjalë pritet të jenë në stol në ndeshjet e ardhshme të Romës.
Roma pësoi një nga humbjet më të turpshme në historinë e klubit në fillim të kësaj jave, duke humbur 6-1 në transfertë, kundër Bodo/Glimt në.Europa Conference League. Mourinho nuk ishte i kënaqur me rezultatin dhe performancën e shumë prej lojtarëve të tij. Mes tyre, Marash Kumbulla, Amadou Diawara, Riccardo Calafiori, Gonzalo Villar dhe Borja Mayoral.
Sipas Calciomercato.com, futbollistët do të paguajnë çmimin më të lartë për humbjen poshtëruese të Romës në Evropë, pasi Mourinho do t’i dërgojë në tribunë, për ndeshjet e ardhshme në kampionat dhe Europë. Ndryshimet u vunë re dhe në ndeshjen përballë Napolit, e cila u mbyll në barazim 0-0. Në takimin në fjalë, “The Special One” zbriti në fushë një formacion krejt tjetër nga ai i zakonshmi, sidomos në mbrojtje. Lojtarët “nën shënjestër” nuk kanë lëndime apo pezullime, por nuk do të jenë të disponueshëm për skuadrën, e cila ka humbur dy ndeshje radhazi këtë javë, kundër Juventusit në Serie A dhe Bodo/Glimt në Ligën e Konferencës.
“Ka lojtarë mes jush që nuk do të luanin as këtu në Norvegji, apo edhe në Serinë B”, thuhet se u ka thënë Mourinho lojtarëve të tij pas rezultatit turpërues.
Megjithëse portugezi mori përgjegjësinë për humbjen në intervistën e tij pas ndeshjes, ai theksoi mungesën e lojës kualitative në pjesën e dytë të takimit:
“Ne kemi një ekip shumë të mirë, nuk kemi një skuadër shumë të mirë”, tha portugezi për Sky Sport Italia.
“Sot, ne nuk luajtëm me ekipin, luajtëm me skuadrën dhe u ndëshkuam nga kjo.”
“Verdhekuqtë” gjenden tashmë në vendin e katërt në tabelën e Serie A, 9 pikë larg liderit Milan, i cili ka një ndeshje në dorë pas fitores ndaj Bolonjës. Deri më tani, aventura e teknikut portugez në krye të Romës është karakterizuar nga ulje-ngritje.
