Sulmuesi serb i Fiorentinës, Dusan Vlahovic, duket se është nën radarët e klubeve të rëndësishme në Premier League. Sipas raportimeve më të fundit, Newcastle dhe Tottenham janë seriozisht të interesuar për shërbimet e futbollistit. Klubet angleze janë të gatshme të paguajnë deri në 50 milionë paundë për kartonin e sulmuesit, i cili gjithashtu mësohet se është në favor të transferimit.
Fiorentina e di se nuk mund ta mbajë gjatë lojtarin në klub, dhe për këtë arsye, ekipi nga Serie A ka nisur të kërkojë për një zëvëndësues potencial. Transferimi i Vlahovic me shumë mundësi do të bëhet realitet verën e ardhshme, por ofertat e majme financiare pritet të vijnë që në janar. Kujtojmë se futbollisti ka një kontratë aktive me Fiorentinën deri në vitin 2023, dhe sa më shumë kalon koha, aq më shumë rritet rreziku që çmimi i lojtarit në treg të shkojë drejt rënies.
Vlahovic shënoi 21 gola në kampionat gjatë sezonit të kaluar me klubin italian. Edhe këtë sezon, forma e tij ka qënë mjaft impresive, me 6 gola në 8 paraqitje në të gjitha kompeticionet.
Tottenham kërkon me ngulm sulmuesin, duke marrë parasysh një largim të mundshëm të Harry Kane. Ndërkohë Newcastle kërkon shërbimet e serbit, si pjesë e planit afatgjatë që drejtuesit e rinj kanë për klubin.
Por lojtari është gjithashtu nën shënjestrën e Arsenal, Manchester City dhe Liverpool. Agjentët e Vlahovic kanë raporte të mira me klubet angleze, dhe për këtë arsye, Premier League shihet si destinacioni numër 1 ku talenti i Fiorentinës, mund të përfundojë sezonin e ardhshëm.
PSG gjithashtu ka shfaqur interesimin e saj. Francezët duket se kanë pranuar tashmë faktin se Kylian Mbappe do të largohet drejt Real Madrid vitin tjetër. Për këtë arsye, parizienëve u duhet një zëvëndësues i po të njejtit kalibër, dhe Vlahovic është një nga alternativat që konsiderohet në lartësinë e duhur.
