Paris St-Germain ka gjetur akordin me arabët e Al-Hilal, për transferimin e Neymar në kampionatin arab. Parizienët do të përfitojnë plot 90 milionë euro nga transferimi, ndërkohë që marrëveshja pritet të zyrtarizohet shumë shpejt, duke qënë se Neymar gjithashtu ka rënë dakord me Al-Hilal, përsa i përket termave personale të kontratës.
Braziliani është duke kryer vizitat mjekësore, teksa pritet të udhëtojë drejt Arabisë Saudite brenda kësaj jave. Kujtojmë se braziliani iu bashkua PSG për një shifër rekord prej 222 milionë eurosh nga Barcelona, në vitin 2017. Sulmuesi nuk ishte më pjesë e planeve të trajnerit të ri të PSG, Luis Enrique.
Pavarësisht pritshmërive të larta, pagës stratosferike si dhe rolit si titullar absolut, aventura e Neymar në Paris u shoqërua me periudha të vështira. Braziliani vuajti disa herë dëmtime të cilat e lanë jashtë fushave të blerta për periudha të gjata. Lojtari u aktivizua 173 herë me PSG, duke fituar 13 trofe, përfshirë këtu 5 tituj kampionë në Ligue 1. Megjithatë, braziliani nuk ia doli dot të fitonte Champions League, trofeun numër 1 në listën e prioriteteve të klubit.
Tashmë Neymar do të bëhet pjesë e një aventure të re, së bashku me shumë emra të tjerë të njohur të futbollit europian, të cilët zgjodhën Arabinë Saudite si kapitullin e ri të karrierës. Mes tyre janë Karim Benzema, Cristiano Ronaldo, N’Golo Kante, Sadio Mane, Ruben Neves, Roberto Firmino etj.
Ndërkohë tek PSG, Kylian Mbappe gjithashtu është rikthyer në ekip pas bisedimeve të cilësuara pozitive nga ana e drejtuesëve të klubit. Fati i Mbappe në Paris është ende i paqartë, por sulmuesi mund të firmosë një kontratë të re me PSG, pavarësisht interesit të Real Madrid. Francezi u la jashtë skuadrës së tij, në ndeshjen hapëse të Ligue 1 ndaj Lorient, por duket se problematikat mes tij dhe klubit tashmë janë zgjidhur.
