Sulmuesi i Paris St-Germain, Neymar, pritet të humbasë pjesën e mbetur të sezonit për shkak të një dëmtimi. Superstari brazilian duhet t’i nënshtrohet operacionit në kyçin e djathtë, pas dëmtimit të rëndë që mori në fitoren 4-3 të PSG ndaj Lille para 2 javësh. Lajmi është konfirmuar në një deklaratë zyrtare nga vet klubi.
PSG bëri me dije se Neymar ka vuajtur disa dëmtime të herëpashershme në kyçin e djathtë përgjatë këtyre viteve, dhe operacioni është i nevojshëm për të shmangur përsëritjen. Klubi gjithashtu konfirmoi se do të duhen të paktën 3-4 muaj që braziliani t’i rikthehet përsëri stërvitjes.
Kjo nuk është hera e parë që Neymar pëson një dëmtim serioz, teksa sulmuesi humbi të gjithë turneun e Copa America në vitin 2019 për të njejtën arsye. Gjithashtu, Neymar nuk ishte prezent për Brazilin në 2 ndeshje gjatë botërorit të Katarit, pas një dëmtimi të marrë në sfidën ndaj Serbisë.
Mungesa e lojtarit është një lajm i keq për trajnerin Christophe Galtier. PSG do të përballet me Bayern Munich ditën e mërkurë, në sfidën e vlefshme për UEFA Champions League. Parizienët u mposhtën 1-0 në Paris dhe tashmë kanë një detyrë të vështirë në Gjermani, ku duhet të përmbysin rezultatin.
Situata paraqitet shumë më mirë në kampionat për francezët, teksa ekipi kryeson Ligue 1, me 8 pikë diferencë nga ndjekësit më të afërt. Gjithsesi, Champions League ka qënë dhe mbetet objektivi kryesor i ekipit. Finalja e kompeticionit prestigjoz do të luhet në datë 10 qershor këtë vit, dhe edhe nëse PSG ia del t’i shkojë deri në fund, Neymar nuk do të jetë gati për sfidën.
Pavarësisht situatës së vështirë me dëmtimet e njëpasnjëshme, braziliani ka shënuar 13 gola në kampionat këtë sezon, si dhe ka asistuar 10 herë shokët e tij të skuadrës.
