Patrick Vieira ka thënë se ende ka shumë dyshime, mbi shancet e kombëtares italiane për të avancuar në Euro 2020. Në një analizë të fundit, ish-futbollisti francez është shprehur se ekipit të Mancinit i mungon “intensiteti, fuqia dhe shpejtësia”. Fitoret 3-0 përballë Turqisë dhe Zvicrës duket se nuk kanë mjaftuar për t’i mbushur mendjen Vieira, i cili refuzoi të përfshihet në entuziazmin e momentit që po kalon ekipi italian. Ky i fundit është i mendimit se të besuarit e Mancinit ende nuk janë testuar përballë një kundërshtari të fortë.
Francezi u shpreh për ITV:
“Mendoj se 2 ndeshjet e para që kanë luajtur (Italia) kanë qenë mjaft të lehta. Nuk mendoj se janë testuar vërtet. Duhet të pres ende pasi mendoj se është herët, për të konsideruar Italinë si një nga ekipet që mund t’i shkojë garës deri në fund.”
Patrick Vieira
Ishte vet trajneri Mancini, i cili shtjelloi në një farë mënyre, argumentin e Vieira. Në intervistën pas fitores me Zvicrën, numri 1 i pankinës italiane u kujdes që të ulte dozat e entuziazmit:
“Në Europian ke skuadra si Franca, Portugalia dhe Belgjika. Njëra prej tyre është kampione bote, tjetra kampione Europe, ndërsa Belgjika është skuadra e parë në renditjen botërore të kombëtareve. Këto janë ekipe që formuar përgjatë disa viteve, dhe është e natyrshme që të jenë më të avantazhuar se skuadrat e tjera. Por, gjithçka mund të ndodhë në futboll.”
Mancini shtoi:
“Jam me fat që kam nën drejtimin tim lojtarë mjaft të mirë, të cilët adhurojnë lojën dhe janë të gatshëm të ndërmarrin risqe. Ata meritojnë të gjitha meritat. Unë mundohem t’u shpjegoj procesin e mendimit, por duhet shumë punë për ta zbatuar atë.”
Megjithëse skepticizmi është ende prezent kur flitet për kombëtaren italiane, ekipi i Mancinit ka treguar grintë dhe karakter. Këto 2 cilësi mund të vënë në vështirësi edhe skuadrat me organikë më të mirë se “Azurët” në Euro 2020.