Mesfushori i Juventus dhe kombëtares franceze, Paul Pogba, i është nënshtruar një operacioni në gju pas një dëmtimi të marrë në korrik. Lojtari nuk ka luajtur që prej atij momenti dhe Pogba mund të humbasë Kupën e Botës që do të luhet në Katar në pjesën më të madhe të muajit dhjetor. Ndeshja e parë e Francës në Botëror do të jetë ajo përballë Australisë në 22 nëntor.
Trajneri i Juventus, Massimiliano Allegri, u pyet mbi operacionin e Pogba. Tekniku italian deklaroi:
“Këtë mëngjes Pogba u stërvit për herë të dytë, por pastaj ndaloi, dhe ne vendosëm që t’i nënshtrohej operacionit. Nëse flasim në mënyrë realiste, ai do të kthehet në janar.”
Serie A do të ndalet në 13 nëntor, duke i paraprirë Kupës së Botës, dhe më pas do të rikthehet përsëri në janar, kur kampionati botëror të ketë përfunduar. Trajneri Allegri gjithashtu u pyet në mënyrë të drejtpërdrejtë nëse Pogba do të mund të luajë në Katar. Gjithsesi, italiani refuzoi të përgjigjej, duke thënë se Botërori nuk është problemi i tij.
Pogba iu ribashkua “Zonjës së Vjetër” këtë merkato vere me kosto zero, pas skadimit të kontratës së tij me Manchester United. Futbollisti i talentuar nuk ia doli asnjëherë të performonte në mënyrë konsistente në Old Trafford. Por, nuk mund të thuhet e njejta gjë për paraqitjet e tij me kombëtaren franceze. Roli i Pogba ka qënë vazhdimisht deçiziv në sukseset e “Gjelave”, ku më i rëndësishmi është padyshim triumfi në Kupën e Botës 2018.
Edhe nëse Pogba ia del të rikuperohet në kohë për Botërorin e Katarit, do të ketë ende shumë pikëpyetje në lidhje me kondicionin e tij fizik. Duke marrë parasysh konkurrencën e madhe në ekipin e drejtuar nga Didier Deschamps, nuk është aspak surprizë nëse lojtari humbet vendin e tij të titullarit në kombëtare.
