Kontrata e Paulo Dybala me Juventus skadon në fund të këtij sezoni dhe duket se mesfushori argjentinas nuk ka ndërmend të rinovojë me “Zonjën e Vjetër”. Dëshira e lojtarit për një aventurë përtej Italisë ka kapur vëmendjen e disa klubeve europiane, mes tyre është dhe Arsenal së bashku me Tottenham.
Dybala është linkuar dhe më parë me klubet londineze dhe sipas raportimeve të fundit, agjenti i lojtarit do të diskutojë një transferim të mundshëm të argjentinasit, me përfaqësuesit e dy ekipeve angleze. 28 vjeçari është një nga lojtarët më të talentuar të Juventus dhe ka shënuar deri më tani plot 80 gola në 204 ndeshje në kampionat për juventinët.
Por dëmtimet gjatë 2 sezoneve të fundit, si dhe kërkesat e larta financiare të Dybala kanë shkaktuar mosmarrëveshje mes lojtarit dhe klubit. Kjo ishte dhe arsyeja e refuzimit të një kontrate të re gjatë muajit të kaluar nga ana e argjentinasit. Si Arsenal, ashtu dhe Tottenham janë të interesuar për shërbimet e Dybala, dhe kjo gjë është konfirmuar nga vet agjenti i lojtarit. Gjithsesi, për momentin ende nuk ka një ekip që kryeson garën për kartonin e tij.
Arsenal ka nevojë për opsione në sulm, pas boshllëkut të lënë nga largimi i Pierre-Emerick Aubameyang. Alexandre Lacazette gjithashtu është shumë pranë largimit. Tottenham nga ana tjetër ka nevojë për një sulmues rezervë për Harry Kane. Kapiteni i kombëtares angleze mban një peshë mjaft të madhe në repartin e sulmit dhe trajneri Conte kërkon më shumë siguri.
Arsenal dhe Tottenham po garojnë në mënyrë direkte me njëri-tjetrin për një vend në Champions League sezonin e ardhshëm. Skuadra që do të arrijë objektivin me shumë mundësi do të ketë dhe avantazhin në garën për kartonin e Dybala, duke qënë se lojtari padyshim që kërkon të luajë në kompeticionin prestigjoz.
