Arsenal dhe Manchester City siguruan një tjetër fitore, në garën e ashpër për titullin kampion në Premier League. Londinezët triumfuan 1-0 përballë Leicester City në transfertë, ndërkohë që “qytetarët” e Pep Guardiolës mposhtën me rezultatin e thellë 4-1 AFC Bournemouth, gjithashtu në transfertë.
Përsa i përket Arsenal, londinezët dominuan gjithë takimin, duke mos i dhënë asnjë mundësi shënimi Leicester. “Dhelprat” nuk realizuan dot asnjë goditje të vetme në portën e kundërshtarëve. Arsenal ndërkohë i mjaftoi goli i Gabriel Martinelli në minutën e 46’ të sfidës, për të marrë 3 pikë mjaft të rëndësishme.
Fillimisht londinezët kaluan në avantazh me Trossard, por goli i këtij të fundit u anullua nga sistemi VAR, për shkak të një faulli gjatë ndërtimit të aksionit. Arsenal gjithashtu iu anullua dhe një gol tjetër, kësaj rradhe i Saka, për shkak të një pozicioni jashtë loje. Në këtë sfidë, shiriti i kapitenit tek londinezët iu dha Oleksandr Zinchenko, në shenjë respekti ndaj sacrificës së ukrainasve në frontin e luftës me Rusinë. Ndeshja e rradhës për ekipin e Mikel Artetës do të jetë ajo përballë Everton në shtëpi.
Nga ana tjetër, Manchester City u shfaq i sigurtë në fitoren 4-1 përballë AFC Bournemouth. Erling Haaland u rikthye tek goli ndërkohë që Álvarez dhe Foden gjithashtu gjetën rrugën e rrjetës. Trajneri Guardiola eksperimentoi përsëri me taktikat dhe rreshtimin e lojtarëve, por duket se kësaj rradhe bëri zgjedhjen e duhur. Ndërkohë, për AFC Bournemouth shënoi Lerma në minutën e 83’.
Fitorja ishte mjaft e rëndësishme dhe në aspektin motivues për Manchester City, që la pas një javë vërtet frustruese me barazime ndaj Nottingham Forest dhe RB Leipzig në Champions League.
Arsenal kryeson renditjen e Premier League, por diferenca me City është tashmë vetëm 2 pikë. Megjithatë, të besuarit e Mikel Artetës kanë një ndeshje më shumë për të luajtur.
