Pas përfshirjes zyrtare të Manchester City në garën për kartonin e Declan Rice, Arsenal është hedhur përsëri në sulm, duke bërë ofertën e tretë financiare për shërbimet e anglezit. West Ham refuzoi 90 milionë paundë të ofruara nga Manchester City, duke ditur mjaft mirë se Arsenal do të hidhej përsëri në sulm, dhe pikërisht kjo ndodhi.
Londinezët kanë ofruar tashmë 105 milionë paundë për kartonin e Rice. Megjithatë, drejtuesit e West Ham ende kanë rezervat e tyre për strukturën e ofertës, dhe nuk pritet të pranojnë direkt propozimin. Kjo pasi Manchester City gjithashtu mund të vijë me një tjetër ofertë më të mirë. Pep Guardiola arriti të sjellë në Etihad Mateo Kovacic nga Chelsea, por largimi i Ilkay Gundogan drejt Barcelonës duket se ka lënë përsëri një hendek në mesfushë, dhe trajneri spanjoll kërkon opsione solide për të ardhmen. Rice është sigurisht një prej tyre.
Lojtari mund të aktivizohet pa problem në disa pozicione, di të lexojë mjaft mirë situata të vështira në mbrojtje, si dhe të ndërtojë aksione në sulm, duke shtyrë ekipin përpara. Kjo e bën anglezin mjaft të përshtatshëm për modulin e lojës së Pep Guardiolës, i cili kërkon shumë lëvizshmëri nga lojtarët e tij në fushën e blertë.
Kujtojmë se sipas kontratës aktuale, Declan Rice ka opsionin për të rinovuar për 1 vit ekstra me West Ham, deri në 2025. Megjithatë, tashmë është e qartë se mesfushori anglez do të lërë klubin. Kjo u konfirmua nga vet presidenti David Sullivan, pas triumfit të ekipit në Europa Conference League. Sullivan u shpreh se ishte 99% i sigurtë se Rice do të largohej nga West Ham këtë verë.
Rice ka shënuar 15 gola në 245 ndeshje për West Ham. Lojtari bëri debutimin me ekipin e parë në sezonin 2016-2017 dhe është produkt i akademisë së klubit. Mesfushori gjithashtu është aktivizuar plot 41 herë me kombëtaren angleze, duke u kthyer në një nga lojtarët më të rëndësishëm dhe titullar në formacionin e Gareth Southgate.
