Ish-sulmuesi i famshëm i Premier League, Chris Sutton, ka komentuar ndeshjet e fundit të Arsenal, duke vënë në pikëpyetje mentalitetin e ekipit të Mikel Artetës. Londinezët kanë regjistruar dy barazime në ndeshjet e fundit në Premier League, rezultate që kanë lënë të zhgënjyer shumë fansa të klubit, kjo dhe për shkak të mënyrës sesi ndeshjet u zhvilluan.
Arsenal nuk ia doli dot të ruante avantazhin e dyfishtë përballë Liverpool dhe West Ham, duke marrë përfundimisht nga 1 pikë në secilën presj sfidave. Sutton ka komentuar mbi lojën e “topçinjëve”, dhe shanset e tyre për t’u shpallur kampionë në Premier League:
“Pyetja që fansat e Arsenal kanë sot është, a mos vallë është kjo dita kur ëndrra për titullin kampion mori fund? Kur Arsenal nuk ia del të ruajë dot një avantazh të dyfishtë në dy ndeshjet e fundit, vihet në pikëpyetje fakti nëse ekipi e ka forcën e duhur mendore për t’i shkuar deri në fund dhe për të fituar titullin.”
Londinezët kryesojnë renditjen e Premier League me 4 pikë diferencë nga Manchester City i vendit të dytë, por ekipi i Pep Guardiolës ka një ndeshje më shumë për të zhvilluar. Ndërkohë, ish-mbrojtësi i kombëtares angleze, Matt Upson, ka ende besim se Arsenal mund t’ia dalë dhe të shpallet kampion. Upson u shpreh:
“Tani, ajo që ata (Arsenal) duhet të bëjnë është të mos i lënë dyshimet t’i demotivojnë. Detyra e Artetës dhe stafit të tij është që të mos i lejojnë lojtarët të ndihen keq apo të mendojnë negativisht për veten e tyre… Ata janë ende në një pozicion mjaft të mirë, duhet të ruajnë të njejtin mentalitet, duhet të vazhdojnë të besojnë, kjo është detyra e Arsenal për momentin dhe ata duhet të vazhdojnë të ecin përpara.”
