Drejtuesit e Arsenal janë të vendosur për të sjellë Amadou Onana në Emirates, sezonin e ardhshëm. Mesfushori difensiv i Everton është një nga lojtarët që ka rënë më shumë në sy këtë sezon, ndërkohë që impakti dhe prezenca e tij në mesfushë është e padiskutueshme. Shtatëlartësia e lojtarit dhe fiziku i tij i fortë e bëjnë atë një aset mjaft të vlefshëm për cdo ekip, dhe sidomos për Arsenal, që mbështetet fort edhe tek goditjet standarte. Por a është Everton i gatshëm të heqë dorë nga një prej lojtarëve të vet më të mirë?
Klubi anglez thuhet se kërkon plot 80 milionë paundë për shërbimet e mesfushorit, një shifër mjaft e lartë, por jo e papërballueshme për Arsenal. Megjithatë, londinezët mund të përfshihen në një betejë financiare për kartonin e Onana, teksa Chelsea dhe Manchester United janë gjithashtu të interesuar për belgun. Situata bëhet akoma më delikate duke marrë parasysh faktin se drejtuesit e Arsenal gjithashtu kërkojnë të sjellin në klub një sulmues elitar në merkaton e verës. Edhe ky operacion pritet të jetë mjaft i kushtueshëm.
Por pavarësisht vështirësive për të realizuar transferimin, është i padiskutueshëm fakti se Onana zotëron potencialin për të ndryshuar dinamikën në mesfushën e Arsenal. Së bashku me Declan Rice dyshja do të kthehej në një nga më të fortat, dhe padyshim e denjë për të pretenduar titullin kampion në Premier League.
Ndërkohë një tjetër aspekt që nuk përmendet shpesh për lojtarin është shpejtësia e tij. Pavarësisht shtatlartësisë, sipas statistikave të Premier League për këtë sezon deri më tani, Onana është mes lojtarëve më të shpejtë. Belgu regjistroi një shpejtësi maksimale impresionuese prej 36.65km/h. Kjo e bën Onana një atlet dhe lojtar të kompletuar. Duke marrë parasysh dhe eksperiencën e tij në Premier League, përshtatja me një klub të ri gjithashtu nuk pritet të jetë problem.