Drejtuesit e Arsenal janë të bindur se kryesojnë garën për shërbimet e mesfushorit të talentuar të West Ham, Declan Rice. Anglezi ka refuzuar vazhdimisht të nënshkruajë një rinovim kontrate me klubin e tij aktual, dhe duket se largimi është thjesht një çështje kohe. Drejtuesit e West Ham e vlerësojnë kartonin e lojtarit në shifrat e 100 milionë paundëve dhe mendohet se janë të gatshëm të përfitojnë nga shërbimet e lojtarit.
24 vjeçari ka një kontratë aktive me West Ham deri në vitin 2025 dhe drejtuesit e klubit nuk duan të rrezikojnë dhe ta humbasin atë me kosto zero. Vet Rice nuk e ka fshehur dëshirën e tij për të luajtur për një ekip më të madh, duke treguar mbi ambicien e tij për të fituar trofe rregullisht dhe për të triumfuar dhe në Champions League.
Arsenal e ka vendosur veten në “pole position” për të siguruar shërbimet e Rice, dhe një meritë e madhe për këtë i takon trajnerit Mikel Arteta. Londinezët ndodhen në vendin e dytë në kampionat, kanë një brez të jashtëzakonshëm talentesh që premtojnë shumë, si dhe do të luajnë në Champions League sezonin e ardhshëm. Për më shumë, Rice do ta ketë të sigurt vendin e titullarit në ekipin e Artetës.
Termat personale mes lojtarit dhe klubit nuk pritet të jenë problem, teksa Arsenal është gati ta bëjë Rice një nga yjet më të paguar në Emirates. Momentalisht Rice fiton rreth 60 mijë paundë në javë tek West Ham, dhe mesfushori mund ta katërfishojë pa frikë këtë shifër nëse firmos me Arsenal.
Chelsea, Manchester United dhe Manchester City gjithashtu janë të interesuar për anglezin, por Arsenal duket se ka një strategji të qartë për rolin e Rice në ekip, si dhe një plan të mirëfilltë për të fituar trofe në të ardhmen.