Drejtuesit e Arsenal janë të gatshëm të heqin dorë prej të paktën 4 lojtarëve në janar, për të siguruar fondet e nevojshme për kartonin e Ivan Toney. Sulmuesi i Brentford është kthyer në objektivin kryesor të trajnerit Mikel Arteta, duke u nisur dhe nga nevoja e madhe për të patur më shumë opsione në repartin ofensiv.
Gabriel Jesus ka startuar vetëm 4 përballje në Premier League si titullar, për shkak të dëmtimeve. Ndërkohë Eddie Nketiah ka shënuar 5 herë në kampionat, por paraqitjet e tij janë përsëri larg nivelit të kërkuar prej trajnerit Arteta. Arsenal është në kërkim të një lojtari të ngjashëm me bomberin e Manchester City, Erling Haaland, i cili është në gjendje të prodhojë në mënyrë konsistente në cdo ndeshje. Toney duket emri perfekt, por cilët janë lojtarët që duhet të largohen për t’i hapur vend afrimit të tij?
Emile Smith Rowe, Aaron Ramsdale, Eddie Nketiah dhe Thomas Partey janë të gjithë në listë. Smith Rowe ka patur një periudhë të vështirë me dëmtimet, dhe kjo ka bërë që lojtari të humbasë besimin e trajnerit Arteta, duke humbur kështu rolin e titullarit në mesfushë. Edhe pas rikthimit të tij në sfidën ndaj Sheffield United, lojtari mori përsëri një dëmtim që mund ta lërë jashtë fushave për disa javë të tjera.
Aaron Ramsdale gjithashtu mund të largohet, teksa portieri anglez e ka humbur rolin e titullarit tek Arsenal, që prej ardhjes në ekip të David Raya. Ramsdale nuk ka shprehur asnjëherë deri më tani dëshirën për t’u larguar, por portieri ka konfirmuar se dëshiron si të gjithë lojtarët të jetë titullar. Nëse situata për të nuk ndryshon, largimi i tij është i mundshëm. Ndërkohë mes emrave të tjerë që mund të largohen nga Emirates janë dhe Thomas Partey e Eddie Nketiah. Ky i fundit do të jetë i detyruar të largohet nëse Arsenal sjell një tjetër sulmues në ekip, pasi Nketiah do të përfundonte si zgjedhja e tretë për trajnerin Arteta.