Drejtuesit e Arsenal janë gati të presin oferta për Gabriel Jesus në merkaton e verës. Klubi londinez kërkon të sigurojë të ardhura të mjaftueshme, për të sjellë një emër të madh në Emirates, sezonin e ardhshëm. Braziliani ka performuar mjaft mirë në këtë dy sezone për Arsenal, por problemet e tij të vazhdueshme me dëmtimet janë një pikë shqetësuese për trajnerin Arteta, që kërkon më shumë konsistencë dhe siguri në sulm.
Dëmtimet kanë qënë arsyeja kryesore se përse Jesus ka shënuar vetëm 8 gola këtë sezon, 4 prej të cilëve në Premier League. Sulmuesi ka një kontratë aktive me klubin deri në vitin 2024, por drejtuesit e Arsenal janë në kërkim të një lojtari që mund të bëjë diferencën, për të ndihmuar ekipin të fitojë trofe.
Arsenal është në kërkim të lojtarëve në profilin e Erling Haaland apo Mohammed Salah, të cilët jo vetëm performojnë në mënyrë konsistente, por dhe janë mjaft të saktë në konvertimin e shanceve para portës.
Jesus ka vetëm disa ndeshje për t’i provuar drejtuesëve të Arsenal se meriton një tjetër shanc në formacionin e ekipit, në sezonin e ardhshëm. Megjithatë, vendimi mund të jetë marrë tashmë, teksa Arsenal është duke kërkuar për përforcime në repartin e sulmit.
Një prej tyre është Marcus Rashford. Anglezi po kalon një situatë të vështirë tek Manchester United, dhe duke marrë parasysh dhe ndryshimet që pritet të ndodhin tek “Djajtë e Kuq” sezonin që vjen, ai mund të jetë drejt largimit. Në rast se drejtuesit e United vendosin të shesin Rashford dhe kërkesat e tyre financiare janë të arsyeshme, drejtuesit e Arsenal mund të hidhen në sulm për kartonin e tij. Nga ana tjetër, një tjetër emër që londinezët po monitorojnë është Bruno Guimaraes i Newcastle. Për këtë të fundit, Manchester City gjithashtu ka shprehur interesin e vet.
