Drejtuesit e Arsenal kanë refuzuar interesimin e Newcastle dhe Aston Villa, për Emile Smith Rowe. Villa, Newcastle por dhe West Ham janë ndër klubet e interesuara për kartonin e sulmuesit anglez, por duket se trajneri Arteta nuk ka ndërmend ta lërë lojtarin të largohet. Kjo, pavarësisht faktit se Smith Row është aktivizuar vetëm 2 herë këtë sezon, në Carabao Cup ndaj Brentford, si dhe ndaj Sheffield United në Premier League.
Mediat angleze kanë bërë me dije se vet lojtari kërkon të rifitojë rolin e titullarit në skuadrën e trajnerit Arteta, dhe ndihet i lumtur në Emirates. Zëra pranë Smith Rowe thonë se sulmuesi gjithashtu nuk e pëlqen idenë e një huazimi për pjesën e mbetur të sezonit. Kjo ishte ajo që kërkonte West Ham këtë merkato, teksa klubi po ndjen momentalisht mungesën e Lucas Paqueta në sulm, i cili është i dëmtuar.
Ndërkohë nga ana tjetër, Newcastle dhe Aston Villa janë më shumë të interesuara për një transferim të plotë. Duke u nisur nga nevojat e Arsenal për momentin, si dhe nga vet dëshira e Smith Rowe duket se ky skenar mund të ndodhë vetëm gjatë merkatos së verës, në fund të sezonit.
Arsenal ndërkohë u rikthye tek fitorja në mënyrë mjaft bindëse në Premier League. Ekipi i trajnerit Mikel Arteta triumfoi me shifrat 5-0 ndaj Crystal Palace në Emirates. Golat për Arsenal u shënuan nga Magalhães, Trossard, Martinelli si dhe një autogol nga D. Henderson. Gjithsesi, pavarësisht fitores mbresëlënëse dhe të thellë, bordi i Arsenal është përsëri i vendosur për të sjellë një sulmues të klasit botëror në Emirates gjatë janarit.
Ivan Toney është emri më i përmendur, ndërkohë që së fundmi klubi londinez është linkuar dhe me emrin e Karim Benzema. Ish-sulmuesi i Real Madrid luan në kampionatin e Arabisë Saudite, por mund të rikthehet në mënyrë spektakolare në Europë.
