Pas humbjes ndaj Manchester City, duket se trajneri i Arsenal, Mikel Arteta, nuk i ka humbur shpresat përsa i përket titullit kampion. Londinezët u mposhtën 3-1 në shtëpinë e tyre nga City, që kryeson tashmë renditjen falë golavarazhit më të mirë sesa kundërshtarët. Gjithsesi, Arteta është shprehur optimist për të ardhmen në përfundim të takimit. Spanjolli tha:
“Ata (lojtarët e Arsenal) ende kanë besim, mund ta ndiej. Ata mendojnë se mund t’ia dalin. Kam më shumë besim sesa kisha përpara takimit. Me performancën dhe nivelin e lojës që dëshmuam patëm ndjesinë se mund t’i mundnim. Deri në momentin që ata shënuan golin e dytë. U dhamë atyre (City) 3 gola dhe lojën në fund të takimit. Gabime të tilla nuk mund të bëhen në këtë nivel…Diferenca ishte në zone, ata paten 3 shanse dhe i shfrytëzuan. Ne patëm shanset tona dhe nuk e bëmë.”
Arteta gjithashtu u shfaq i zhgënjyer me rezultatin, por pranoi se City është një nga ekipet më të mira në botë. Tekniku shtoi:
“Kam më shumë besim (për të fituar kampionatin) pasi shikoj një skuadër që ndeshet kokë më kokë me ta (City). Duhet të mendojmë për tjetrën dhe për 3 ditë kemi një tjetër sfidë. Kam më shumë besim tek lojtarët e mi.”
Ndërkohë, mesfushori Martin Odegaard vuri në dukje aspekte të caktuara të lojës së Arsenal që sipas tij kanë nevojë për përmirësim:
“Nuk ishim të mprehtë sa duhet përpara portës së kundërshtarit, dhe tonës. Ndonjëherë shanset realizohen, ndonjëherë jo. Por kjo është pjesa ku duhet të përmirësohemi dhe të jemi më të saktë e të mbrojmë zonën tonë. Ashtu si kemi thënë gjatë gjithë sezonit, duhet të punojmë fort dhe ta marrim ndeshje pas ndeshjeje. E njejta gjë vlen dhe tani. Humbëm një ndeshje tani mendojmë për tjetrën.”