Liverpool dhe Chelsea nuk shkuan më shumë se barazimi në Anfield, në një sfidë që nxorri në pah vështirësitë që po kalon secili ekip në javët e fundit. Rezultati do të thotë se të dyja skuadrat gjenden tashmë shumë larg zonës që i siguron kualifikimin në Champions League.
Kai Havertz dërgoi topin në rrjetë për Chelsea në minutat e para të takimit, por goli i tij u anullua nga sistemi VAR për pozicion jashtë loje. Nga ana tjetër, Cody Gakpo pati një rast të mirë për të kaluar në avantazh Liverpool, por portieri Kepa bëri mjaft mirë detyrën duke larguar topin. Mykhailo Mudryk ndërkohë debutoi me fanellën e Chelsea në pjesën e dytë të sfidës, dhe pavarësisht se nuk arriti të shënojë, i dha më shumë energji dhe dinamizëm lojës së Chelsea.
Trajneri i Liverpool, Jurgen Klopp, komentoi mbi paraqitjen e të tijëve në fund të sfidës:
“Patëm momente të mira por nuk ishim konsistentë. Duhet të bëhemi gati për të hedhur hapa të vegjël, dhe ky ishte një hap i vogël. Një ndeshje pa pësuar gol përballë Chelsea…Në fund të ditës jam i kënaqur me këtë rezultat pasi duhen pranuar këta hapa të vegjël. Mund të ndërtojmë diçka mbi to.”
Nga ana tjetër, trajneri i Chelsea, Graham Potter gjithashtu u shfaq i kënaqur me paraqitjen e ekipit të tij. Ai tha:
“Mendoj se performanca ishte e mirë. Jam i lumtur me skuadrën, me energjinë dhe me atë që u munduam të bënim në fushë. Në Anfield është gjithmonë e vështirë. Nuk pësuam gol dhe morrëm 1 pikë, ecim përpara. Mbi të gjitha, një ditë pozitive, pavarësisht se kërkonim 3 pikët.”
Në fakt ishin londinezët ata që në shumicën e rasteve iu afruan më shumë fitores, por duke marrë parasysh rrethanat, barazimi mund të konsiderohet një rezultat i drejtë, që justifikon lojën e të dyja skuadrave.
