Manchester City siguroi një fitore tepër të rëndësishme përballë Arsenal në transfertë, duke u rikthyer për herë të parë në krye të renditjes, që prej nëntorit të vitit të kaluar. “Qytetarët” e Pep Guardiolës triumfuan 3-1 në Emirates, teksa u treguan më të ftohtë dhe më të kujdesshëm, duke shfrytëzuar gabimet e kundërshtarit.
Ishte pikërisht City që kaloi në avantazh në fillim, në minutën e 24’ të sfidës me anë të De Bruyne. Mefushroi shfrytëzoi mjaft mirë një passim të gabuar në prapavijë të Takehiro Tomiyasu, dhe mposhti portierin Ramsdale. Gjithsesi, Arsenal vendosi baraspeshën 3 minuta para përfundimit të pjesës së parë. Bukayo Saka shënoi nga pika e bardhë e 11-metërshit, pas ndërhyrjes së gabuar të portierit Ederson ndaj Eddie Nketiah në zonë.
Pjesa e parë u mbyll në barazim 1-1, teksa diferencat ishin të vogla mes ekipeve. Gjithsesi, në të dytën Manchester City ishte më kreativ në lojën e vet, gjë që u shpërblye në minutën e 72’ të takimit. Jack Grealish konkludoi një kundërsulm të shpejtë dhe mjaft të bukur të kundërshtarëve, duke kaluar përsëri në avantazh të tijët.
Arsenal u mundua të rifutej në lojë por për fatin e mirë të miqëve, përpjekjet e londinezëve dështuan. 10 minuta nga fundi i takimit, Haaland shënoi golin e tretë për City, duke thyer përfundimisht shpresat e të zotëve të shtëpisë për të marrë qoftë dhe 1 pikë. Autor i asistit të golit ishte De Bruyne i cili zhvilloi një paraqitje fantastike në Emirates.
Rezultati do të thotë se City është tashmë në krye të renditjes së Premier League, me pikë të barabarta me Arsenal, por me golavarazh më të mirë. Megjithatë, londinezët kanë një ndeshje më shumë për të zhvilluar. Gara për titullin kampion në Angli është mëse e hapur.
