Fulham është duke përgatitur një ofertë për talentin brazilian të Fluminense, mesfushorin Andre. Ky i fundit është gjithashtu në radarin e Liverpool dhe Manchester United, por duket se Fulham ka lënë pas gjigandët anglezë të Premier League, në garën për shërbimet e Andre. Kjo ndodhi pas vizitës së drejtorit ekzekutiv të klubit, Alistair Mackintosh, në Brazil për t’u takuar me përfaqësuesit e lojtarit.
Mackintosh ishte prezent në stadiumin Maracana, ku u luajt dhe finalja e Copa Libertadores mes Fluminense dhe Boca Juniors. Ishte pikërisht Andre ai që udhëhoqi klubin e tij drejt triumfit në kompeticionin prestigjoz, dhe kjo bindi akoma më shumë drejtuesit e Fulham për talentin e tij. Bisedimet për një marrëveshje të mundshme mes klubeve janë ende në zhvillim e sipër, dhe kartoni i lojtarit përllogaritet në vlerën e 30 milionë paundëve.
Një lëvizje në janar ka shumë gjasa të ndodhë, teksa kampionati brazilian mbyllet në dhjetor dhe drejtuesit e Fluminense e kanë më të lehtë të heqin dorë prej mesfushorit të tyre. Megjithatë, Fulham ka përgatitur dhe skenarë të tjerë, në rast se transferimi i Andre nuk realizohet. Një nga emrat e tjerë në listën e Fulham është dhe Jonas Wind i Wolfsburg. Megjithëse Wing ka një profil më të qartë sulmues, ai mund të realizojë me sukses dhe detyra të tjera në fushën e blertë.
Trajneri i Fulham, Marco Silva, ka firmosur një kontratë të re me klubin, të vlefshme deri në vitin 2026. Kjo sipas të gjitha mundësive do të thotë se trajneri do të mbështetet nga bordi përsa i përket kërkesave në lidhje me merkaton, dhe si Andre, ashtu dhe Wind janë mjaft të preferuar nga ana e Silva.
Opsionet momentale të Fulham në sulm përfshijnë Carlos Vinicius, Raul Jimenez dhe Rodrigo Muniz, por të gjithë lojtarët e përmendur kanë dështuar të kenë impaktin e pritur prej tyre përpara portës.