Wolves kërkon rreth 60 milionë paundë për shërbimet e të talentuarit Pedro Neto. Ky është lajmi i mediave angleze, që kanë raportuar dhe një herë tjetër se portugezi është nën shënjestrën e Arsenal dhe Tottenham. Neto zhvilloi dy paraqitje fantastike ndaj Manchester United dhe Chelsea këtë muaj, gjë që ka tërhequr akoma më shumë vëmendje drejt lojtarit.
Wolves ndërkohë gjendet në një pozitë shumë të mirë ekonomike, dhe nuk do të nxitohet për të shitur lojtarin, nëse nuk siguron shumën e kërkuar. Klubi ka siguruar më shumë se 100 milionë paundë të ardhura në verë nga shitja e lojtarëve, dhe kjo e ka vendosur Wolves në një pozitë të mirë, dhe përsa i përket rregullave financiare të Premier League.
Neto ndërkohë ka dhe 3 vite kontratë aktive me Wolves. Portugezi ka shënuar 3 gola si dhe ka dhënë plot 8 asiste në 18 ndeshje në të gjitha kompeticionet këtë sezon. Lajm pozitiv është dhe fakti se nisur nga performancat e tij, duket se lojtari e ka lënë pas dhe është rikuperuar plotësisht nga dëmtimi i rëndë që mori para 2 vitesh, i cili e la jashtë fushës së blertë për më shumë se 10 muaj.
Duke qënë se Wolves nuk do të nxitohet për të përfituar nga kartoni i Neto, klubet e Premier League që kërkojnë futbollistin pritet të vihen në një luftë financiare. Trajneri i Arsenal, Mikel Areta, është prej kohësh një adhurues i Neto, dhe dihet gjithashtu se klubi londinez do të sjellë të paktën një sulmues të ri në Emirates, gjatë merkatos së verës.
Në të njejtën kohë, tekniku i Tottenham, Ange Postecoglou gjithashtu është një admirues i Neto, dhe Tottenham mund të hidhet në sulm për lojtarin në verë. Gjithsesi, kjo do të varet dhe nga fakti nëse londinezët vendosin të blejnë përfundimisht kartonin e Timo Werner nga Leipzig.
