Drejtuesit e Tottenham janë gati për të hedhur hapa të mëdhenj në verë, teksa klubi po targeton dy anësorë mjaft të talentuar, për t’u bërë pjesë e londinezëve. Bëhet fjalë për Pedro Neto dhe Eberechi Eze. Konkurrenca do të jetë e fortë për kartonin e lojtarëve, teksa Eberechi Eze është një ndër objektivat kryesorë të Manchester City. Neto i Wolves nga ana tjetër është gjithashtu nën shënjestrën e shumë klubeve rivale në Premier League.
Drejtuesit e Tottenham donin të siguronin një afrim me peshë që në merkaton e janarit, por nuk paten fat në afrimin e lojtarëve. Kjo bëri që klubi londinez të mjaftohej me afrimin e Timo Werner në formë huazimi. Gjermani është paraqitur mjaft mirë deri më tani këtë sezon, por drejtuesit e klubit përsëri duan të sigurojnë përforcime të tjera në repartin ofensiv.
Eberechi Eze, i cili momentalisht aktivizohet me Crystal Palace, thuhet se është më i gatshëm të firmosë me Manchester City. Anësori preferon që hapi i rradhës në karrierën e tij të konsiderohet progres dhe ekipi më i mirë për këtë objektiv është padyshim City i Pep Guardiola. Megjithatë, Tottenham nuk do të dorëzohet dhe pritet të vijë me ofertën e vet për Eze në verë.
Ndërkohë në lidhje me Neto, shancet e Tottenham për të arritur një marrëveshje janë më të larta. Kjo dhe për shkak të historikut të dëmtimeve të lojtarit, që pritet të ulë ndjeshëm koston për kartonin e tij. Arsenal gjithashtu është në ndjekje të Pedro Neto dhe 2 klubet e interesuara për portugezin mund të përfshihen në një betejë financiare. Megjithatë, Arsenal është i fokusuar në pozicione të tjera gjatë merkatos. Ekipi i trajnerit Mikel Arteta pritet të foksuohet në afrimin e një mesfushori dhe një sulmuesi qendre. Ky fakt pritet të ndihmojë akoma më shumë Tottenham në finalizimin e marrëveshjes me Neto.
