Liverpool ia ka dalë t’i rrëmbejë një barazim Arsenal, duke rrezikuar kështu rrugëtimin drejt titullit kampion të londinezëve. Të besuarit e Mikel Artetës ishin në kontroll të sfidës në pjesën e parë, ku dhe arritën të shënonin 2 herë. Megjithatë, Liverpool nuk u dorëzua, duke gjetur 2 herë rrugën e rrjetës, dhe takimi u mbyll në barazim 2-2.
Gabriel Martinelli shfrytëzoi mjaft mirë pasiguritë e Liverpool në mbrojtje, duke gjetur golin e avantazhit për Arsenal që në minutën e 9’ të sfidës. Më pas, londinezët dyfishuan avantazhin me brazilianin Gabriel Jesus. Ky i fundit u la i pamarkuar në zonë nga Virgil van Dijk dhe Andy Robertson, dhe ia doli të dërgojë topin në rrjetë me kokë.
Deri në këtë moment Liverpool ishte totalisht i heshtur, por ekipi i Klopp dha “shenjat e para të jetës” në fund të pjesës së parë. Mohamed Salah shënoi pak para pushimit, për t’i dhënë shpresë Liverpool në momentin e duhur. Në pjesën e dytë të sfidës ekipi i Klopp humbi një rast ideal për të vendosur baraspeshën, kur Mohamed Salah humbi një penallti të akorduar për “The Reds”. Rob Holding ndërhyri në mënyrë të gabuar ndaj Diogo Jota, por egjiptiani nuk ia doli dot të shfrytëzonte 11-metërshin. Gjithsesi, të zotët e shtëpisë do të gjenin eventualisht golin e barazimit në minutën e 87’ me brazilianin Firmino. Sulmuesi shfrytëzoi mjaft mirë një krosim të Alexander-Arnold për t’i dhënë Liverpool një gol të merituar.
Minutat e fundit të sfidës ishin mjaft dramatike, teksa si Arsenal, ashtu dhe kundërshtarët mund të gjenin golin e fitores. Portieri i miqëve, Aaron Ramsdale, bëri dy pritje spektakolare në fund të ndeshjes dhe ekipet ndanë nga 1 pikë të merituar. Rezultati do të thotë se Manchester City ndodhet tashmë vetëm 6 pikë larg Arsenalit kryesues dhe gara për titull kampion është totalisht e hapur.
