Liverpool dhe Tottenham mund të përfshihen në garë për talentin në formë të Wolves, Hwang Hee-chan. Sipas mediave angleze, dy klubet e Premier League janë duke kalkuluar një lëvizje në verë, teksa një transferim në merkaton e janarit ka pak gjasa të ndodhë. Drejtuesit e Liverpool dhe Tottenham janë surprizuar nga performancat e Hee-chan këtë sezon, sidomos kur ky i fundit u vendos në rolin e sulmuesit të qendrës.
Koreani do të shkëputet nga Wolves për të luajtur me kombëtaren e tij në kupën aziatike. Hee-chan ka rënë në sy për fleksibilitetin e tij në fushën e blertë, teksa sulmuesi mund të aktivizohet si në krahun e majtë, ashtu dhe në qendër. Lojtari ka shënuar 11 gola si dhe ka dhënë dhe 3 asiste këtë sezon për skuadrën e tij në Premier League.
Hwang Hee-chan zbarkoi fillimisht tek Wolves si i huazuar nga RB Leipzig në vitin 2021. Vetëm 1 vit më pas koreani firmosi një kontratë permanente me klubin anglez. Si Liverpool, ashtu dhe Tottenham janë në kërkim të përforcimeve në sulm dhe po planifikojnë për sezonin e ri.
Të besuarit e Jurgen Klopp kryesojnë momentalisht renditjen e Premier League, pas fitores spektakolare ndaj Newcastle me rezultatin 4-2. “The Reds” do të jenë pa Mohammed Salah gjatë muajit janar, pasi ky i fundit do të aktivizohet me kombëtaren egjiptiane në Afcon.
Tottenham nga ana tjetër ndodhet në vendin e pestë në renditjen e Premier League, pas 20 ndeshjeve. Trajneri australian Ange Postecoglou ka sjellë një frymë të re tek spursat, dhe niveli i kualitetit është rritur ndjeshëm në lojën e tyre. Megjithatë, nevoja për një sulmues që ofron konsistencë ka qënë gjithnjë e dukshme tek klubi londinez, që prej largimit të Harry Kane drejt Bayern Munich. Kjo është dhe arsyeja kryesore e interesimit për Hee-chan.