Trajneri i Manchester City, Pep Guardiola, kërkon të sjellë në Etihad talentin e Boca Juniors, Valentin Barco. Drejtuesit e Manchester City janë të gatshëm të hidhen në garë për kartonin e argjentinasit, teksa Brighton gjithashtu është i interesuar për të sjellë lojtarin në Premier League.
Gjithsesi, duket se Guardiola ka bërë gati dhe planin për integrimin e futbollistit në kampionatin anglez. Tekniku spanjoll ka besim se “qytetarët” mund të sigurojnë firmën e Barco, por lojtarit do t’i duhet përsëri kohë për t’u përshtatur me futbollin në ishull. Për këtë arsye mendohet se Guardiola do të huazojë menjëherë lojtarin tek Leicester, pas firmosjes së kontratës me City. “Dhelprat” luajnë në kategorinë e dytë angleze, dhe kjo është mundësia më e mirë që Valentin Barco të ambientohet me një stil të ri loje.
Trajneri i Leicester City është Enzo Maresca, një asistent i cili ka punuar pranë Pep Guardiolës. Kjo e bën akoma më të lehtë dhe të realizueshëm planin e teknikut spanjoll. Transferimi i Barco mund të ndodhë që në merkaton e janarit, por plani do të jetë i njejtë edhe nëse afrimi i tij në Etihad shtyhet për në sezonin e ardhshëm. Ndërkohë përsa i përket kostos së transferimit, kartoni i Barco mendohet të jetë në vlerën e 10 milionë paundëve. Por duke llogaritur dhe disa kosto ekstra, vlera e plotë e operacionit mund të shkojë deri në 13 milionë paundë.
Argjentinasi ra në sy gjatë këtij sezoni të Copa Libertadores, pavarësisht se në fund, ekipi i tij u mposht në finale nga brazilianët e Fluminense pas kohës shtesë. Brighton ishte ekipi i parë që bëri një ofertë zyrtare për talentin, por duket se tashmë shanset që Barco të përfundojë tek “pulëbardhat” janë mjaft të vogla, duke parë vendosmërinë e kampionëve në fuqi të Anglisë, për ta sjellë atë në Etihad.