Manchester City pritet të bëjë një ofertë zyrtare në merkaton e verës, për mesfushorin e West Ham, Lucas Paqueta. Drejtuesit e Manchester City ishin gati të sillnin brazilianin në Etihad që verën e kaluar, por ky i fundit u dënua nga Federata Angleze e Futbollit për shkelje të rregullave në lidhje me vendosjen e basteve sportive. Tashmë 26 vjecari pritet të lirohet nga akuzat dhe kjo mund t’i hapë rrugë dhe transferimit të tij tek Manchester City.
Sipas burimeve të Football Insider, West Ham nuk do të pengojë mesfushorin të largohet në rast se ka dëshirë, dhe në rast se City vjen me një ofertë të kënaqshme financiare. Bordi i “qytetarëve” pati rënë dakord në parim me drejtuesit e West Ham, për të paguar 80 milionë euro për kartonin e Paqueta. Gjithsesi, pas lajmit mbi shkeljet që braziliani pati bërë, drejtuesit e Manchester City u detyruan të fokusoheshin tek alternativa të tjera, specifikisht Matheus Nunes i Wolves.
Tashmë, rruga që Paqueta t’i bashkohet City është përsëri e hapur. Lojtari është aktivizuar normalisht, si me West Ham, ashtu dhe kombëtaren braziliane pavarësisht problemeve me bastet sportive. Lojtari ka luajtur gjithsej 33 ndeshje këtë sezon në të gjitha kompeticionet, dhe ka shënuar 7 gola dhe 6 asiste.
Braziliani iu bashkua West Ham nga francezët e Lyon në vitin 2022 dhe ka një kontratë aktive me klubin deri në vitin 2027, me opsionin për të rinovuar dhe një vit ekstra. Paqueta është një nga lojtarët më të rëndësishëm në ekipin e David Moyes dhe do të jetë padyshim një humbje e madhe për klubin në rast se largohet.
Ndërkohë tek Manchester City, nevoja për një mesfushor është gjithnjë e më e madhe. Sezonin e kaluar Gundogan dhe Mahrez u larguan nga Etihad, ndërkohë që këtë sezon, Kevin de Bruyne ka vuajtur vazhdimisht nga dëmtimet. Rrjedhimisht, Guradiola kërkon të ketë më shumë opsione në repartin e mesfushës, dhe Paqueta është një alternativë perfekte për “qytetarët”.
