Matheus Nunes i Wolves do të jetë sipas të gjitha gjasave lojtari më i ri i Manchester City. Afrimi i mesfushorit pritet të zyrtarizohet nga “qytetarët”, pasi sipas mediave angleze, akordi me Wolves është arritur. Fillimisht Manchester City ofroi 47 milionë paundë për kartonin e lojtarit, ofertë kjo që u refuzua nga klubi i tij. Megjithatë, drejtuesit e City po përgatisin një ofertë të re, e cila do t’i dërgohet Wolves përpara mbylljes së merkatos, dhe për të cilën “ujqërit” kanë rënë parimisht dakord.
Sulmuesi i Wolves, Matheus Cunha, u duk se konfirmoi largimin e Nunes nga ekipi, pasi postoi në rrjetin social Instagram një foto të të dyve. Përshkrimi i fotos ishte emocional dhe linte të kuptohej se Nunes do të largohej tashmë nga klubi. Trajneri i ekipit, Gary O’Neil gjithashtu pranoi se Nunes mund të largohej javën e kaluar. Tekniku u shpreh mirëkuptues, duke thënë se i kuptonte arsyet që lojtari mund të kishte për t’u larguar.
Ndërkohë, trajneri i City, Pep Guardiola, është prej kohësh një adhurues i mesfushorit. Vitin e kaluar spanjolli u shpreh:
“Mendoj se Matheus Nunes është një nga lojtarët më të mirë në botë sot.”
Nunes iu bashkua Wolves verën e kaluar, për shifrën e 38 milionë paundëve, një rekord për Wolves. Në vetëm 1 sezon me ekipin, duket se mesfushori ka tashmë opsione më të mira për të ardhmen e tij. Lojtari nuk ishte pjesë e skuadrës në fitoren ndaj Everton, duke qënë se u ndëshkua me karton të kuq në sfidën e mëparshme ndaj Brighton.
Që prej ardhjes së tij tek Wolves, Nunes ka zhvilluar gjithsej 41 paraqitje në të gjitha kompeticionet. Ai do të jetë lojtari perfekt për Guardiolën, i cili duhet të përballet me dëmtimin e Kevin de Bruyne, dhe të gjejë një zgjidhje solide për hapësirat e lëna në mesfushë.