Chelsea vazhdon të jetë i interesuar për shërbimet e asit të Crystal Palace, Michael Olise. Megjithatë, sipas mediave angleze, anësori preferon më tepër një transferim tek Manchester United, që gjithashtu interesohet për të. Tashmë të gjithë në Angli duket se kanë pranuar faktin se Olise do të largohet nga Palace në fund të sezonit, por destinacioni i tij i ri është ende i paditur.
Verën e kaluar Michael firmosi një kontratë të re me Crystal Palace, për 4 vitet e ardhshme, por sipas të gjitha gjasave sulmuesi do të lërë klubin më herët. Në kontratën e tij të re, Olisse ka një klauzolë sipas të cilës mund të largohet në fund të sezonit. Shifra e kësaj klauzole ende nuk dihet zyrtarisht, por besohet të jetë jo më shumë se 35 milionë paundë. Tashmë Chelsea dhe United do të hidhen të dy në sulm në fund të sezonit, për kartonin e lojtarit.
Olise ka qënë në formë mjaft të mirë këtë sezon për Palace, pavarësisht faktit se ka vuajtur dhe dëmtime. Anësori është aktivizuar në 9 takime në Premier League, ku ka regjistruar 5 gola dhe 1 asist.
Manchester United është duke monitoruar me kujdes situatën e Olise, teksa të besuarit e trajnerit Ten Hag kanë nevojë për përforcime në sulm. “Djajtë e Kuq” kanë zhgënjyer para portës këtë sezon, teksa në 21 paraqitje në Premier League kanë realizuar vetëm 24 gola. Chelsea ndërkohë gjithashtu do të jetë në ndjekje të Olise gjatë verës, por blutë e Londrës kanë dhe alternativa të tjera në listën e tyre.
Victor Osimhen është një prej tyre, teksa nigeriani kërkon të largohet në fund të sezonit nga Napoli, dhe ka shprehur gjithnjë dëshirën për të luajtur në Premier League. Megjithatë, Olise është një objektiv më i lehtë për t’u realizuar sesa Osimhen.