Trajneri i Arsenal, Mikel Arteta, ka këshilluar kolegun e tij tek Chelsea, Graham Potter, se si të menaxhojë më mirë presionin e të qënit trajner në Premier League. Potter ka fituar vetëm 9 nga 26 ndeshje me Chelsea, që prej afrimit të tij në krye të pankinës në Stamford Bridge në shtator. Javën e kaluar anglezi u shpreh se presioni i punës ka ndikuar tek shëndeti i tij mendor, pas kërcënimeve anonime online të drejtuara ndaj tij dhe familjes.
Ndërkohë, Arteta shfrytëzoi rastin për të dhënë mendimin dhe këshillat e tij. Tekniku i Arsenal u shpreh:
“Të gjithë e dimë presionin, kërkesat dhe pasigurinë që kjo industri ka. Mund të kesh vështirësi dhe sfida në punën tënde, të cilat i kemi kur humbet, por edhe kur fiton, pasi kjo punë është shumë kërkuese. Por, nuk mund të shkatërrosh jetën tënde për të…”
Arteta shtoi:
“Familja, miqtë dhe të dashurit tuaj, njerëzit rreth jush, nuk meritojnë që jetët e tyre të ndikohen kaq negativisht sepse nuk fitove një ndeshje futbolli. Në rastin tim, balanca ishte kritike, por duhet pak ndihmë, dikush që të të qartësojë, sepse disa herë, kur je në atë pozicion nuk është e lehtë t’i shohësh gjërat qartësisht.”
Chelsea gjendet momentalisht në vendin e 10 në Premier League, plot 26 pikë larg kryesuesëve të Arsenal, dhe 14 pikë larg vendit të fundit që siguron kualifikimin në Champions League sezonin e ardhshëm. Pavarësisht blerjeve të shumta në dy merkatot e fundit, duket se Graham Potter i nevojitet kohë për të krijuar një grup solid dhe një model loje të suksesshëm tek blutë e Londrës.
Chelsea do të përballet me Leeds United në sfidën e ardhshme në kampionat, një mundësi e mirë për t’u rikthyer tek fitorja.