Liverpool do të hidhet në sulm për Pedro Neto, nëse Mohamed Salah vendos të largohet vitin e ardhshëm. Anglezët janë të vetëdijshëm se interesi i klubeve saudite për Salah është i njejti, dhe drejtuesit e klubit duan që të jenë të përgatitur për të gjitha situatat. Pavarësisht faktit se egjiptiani ka ende 2 vite kontratë aktive me “The Reds”, Liverpool po konsideron mundësinë e përfitimit financiar, nga shitja e kartonit të tij. Kujtojmë se Al-Ittihad ofroi plot 150 milionë paundë për asin e Liverpool në verë, por anglezët arritën t’i rezistojnë tundimit, dhe Salah qëndroi në Anfield.
Jurgen Klopp është në kërkim të një sulmuesi, në kalibrin e Salah, që mund të zëvëndësojë egjiptianin. Pedro Neto ka qënë në radarin e klubit prej disa kohësh tashmë, për shkak të paraqitjeve të tij mbresëlënëse me Wolves në Premier League. Kartoni i Neto vlerësohet në shifrën e 30 milionë eurove nga Transfermarket, por Wolves mund të kërkojë një shifër më të lartë për lojtarin, nëse ai vijon me paraqitjet e mira.
Gjithsesi, drejtuesit e Liverpool po tregohen të kujdesshëm për të piketuar dhe alternativa të tjera për sulmin. Verën e kaluar italiani Chiesa ishte në kërkim të një transferimi në Premier League, por asgjë nuk u materializua. Kartoni i sulmuesit vlerësohet në shifrën modeste të 17.1 milionë eurove, gjë që e bën atë zëvëndësuesin perfekt të Salah, të paktën në planin afatshkurtër, në rast se operacioni Neto dështon. Kontrata e Chiesa me Juventus skadon në vitin 2025.
Pavarësisht humbjes kontroversale ndaj Tottenham, për shkak të vendimeve të sistemit VAR, Liverpool e ka startuar mjaft mirë sezonin e ri në Premier League. Megjithatë, duke marrë parasysh rendimentin e lartë dhe numrin e madh të ndeshjeve përgjatë sezonit në disa kompeticione, trajneri Klopp ka nevojë për opsione solide në repartin ofensiv.