Pep Guardiola ka komentuar për herë të parë pas akuzave të Premier League ndaj Manchester City. Trajneri spanjoll ka thënë se ende beson tek pafajshmëria e klubit, duke rikujtuar se të njejtat akuza u bënë dhe nga UEFA, dhe gjykata speciale për çështjet sportive i dha të drejtë “qytetarëve” pas shqyrtimit të çështjes. Guardiola komentoi për mediat:
“Klubi provoi se ishte totalisht i pafajshëm. Ajo që ka ndodhur që prej së hënës është e njejta gjë që ndodhi me UEFA. Ne jemi dënuar një herë. Duhet të kuptoni se 19 ekipe të Premier League po na akuzojnë ndërkohë që ne nuk kemi aftësinë për të mbrojtur veten. Jemi me fat që jetojmë në një vend fantastik ku të gjithë janë të pafajshëm derisa provohet fajësia.”
Guardiola ndërkohë ka surprizuar mediat angleze, duke thënë se shumica e akuzave ndaj City janë shtyrë nga ekipet e tjera të Premier League. Tekniku shtoi:
“Padyshim (që akuzat janë shtyrë nga ekipet e tjera të Premier League), ky është kampionati anglez. Nuk e di përse ndodh. Duhet të pyesni CEO-n. Ata kanë vendosur tani një precedent me atë që kanë vendosur mbi ne. Kini kujdes, kini kujdes në të ardhmen pasi ka shumë klube që janë akuzuar si ne, duke qënë fajtorë. Kushedi se çfarë do të ndodhë në të ardhmen…Ata besojnë se ne nuk jemi sjellë si duhet, mund ta pranojmë këtë, por na lejoni të mbrohemi nëse besojmë të kundërtën.”
Në të kaluarën Guardiola ka thënë se do të largohej nga City në rast se akuzat për shkelje të rregullave në Premier League do të vërtetoheshin. Gjithsesi, Pep konfirmoi se nuk ka ndërmend të largohet nga City, deri në këtë moment. Përkundrazi, trajneri u shpreh më entuziast se kurrë për të vazhduar punën e tij në Etihad.