Southampton arriti të sigurojë një fitore mbresëlënëse 2-1 ndaj Chelsea, në St Mary’s Stadium, duke shtangur të besuarit e Thomas Tuchel. Ishte Raheem Sterling që krijoi iluzionin e një fitoreje të lehtë për blutë, teksa në minutën e 23’ të takimit kaloi në avantazh londinezët me një gol të bukur.
Por vetëm 5 minuta më vonë, një tjetër ish-lojtar i Manchester City, Romeo Lavia, barazoi rezultatin me një goditje të fortë, që nuk i la asnjë shans portierit Edouard Mendy. Goli i baraspeshës erdhi pas një momenti konfuz për mbrojtjen e Chelsea, që nuk diti të largojë si duhet topin nga një goditje këndi. Që pas shënimit të golit, Southampton ishte skuadra që dominoi takimin dhe loja pozitive e të zotëve të shtëpisë do të shpërblehej shumë shpejt.
Në fund të pjesës së parë, Romain Perraud asistoi Adam Armstrong, goditja e të cilit gjeti rrjetën e Chelsea, pas një devijimi nga Kalidou Koulibaly. Southampton kaloi për herë të parë në avantazh dhe rezultati 2-1 nuk ndryshoi deri në fund të takimit. “The Saints” ngjiten kështu në vendin e 7 në renditjen e përgjithshme të Premier League, ndërsa Chelsea ndodhet në vendin e 8 me pikë të barabarta, por golavarazh më të dobët.
Londinezët po kalojnë një moment delikat, teksa trajneri Tuchel e ka bërë të qartë nevojën e klubit për afrime të reja. Megjithatë, merkatoja verore është në ditën e saj të fundit, dhe duket se Chelsea nuk do të afrojë lojtarë të rinj deri në janar. Pas zyrtarizimit të Wesley Fofana, londinezët kanë shpenzuar zyrtarisht më shumë se 200 milionë paundë këtë verë. Duke u nisur nga ky fakt, presioni është gjithnjë e në rritje për trajnerin Tuchel. Ky i fundit duhet të krijojë balancat e duhura në ekip, duke marrë parasysh dhe dëmtimet, që janë shndërruar në një nga problemet kryesore të klubit në javët e fundit.