Drejtuesit e Tottenham janë duke punuar për transferimin e Conor Gallagher nga Chelsea. Sipas mediave angleze, Tottenham nuk ka ndërmend të dorëzohet nga objektivi i vet, dhe brenda kampit të ekpit ekziston besimi se marrëveshja mund të arrihet edhe brenda merkatos së janarit.
Fillimisht Tottenham bëri të ditur interesin e vet për Gallagher në verën e vitit të kaluar. Në atë kohë, West Ham ishte gjithashtu një tjetër klub i interesuar për kartonin e lojtarit. Megjithatë, që prej atij momenti, Conor është kthyer në një titullar të rregullt në ekipin e trajnerit Mauricio Pochettino, ndërkohë që ka marrë dhe shiritin e kapitenit, në mungesë të Reece James, i cili është i dëmtuar.
Megjithatë, Chelsea mund ta lërë Gallagher të largohet duke marrë parasysh përfitimet financiare nga transferimi i tij. Në rast se operacioni realizohet, Chelsea do të llogarisë si fitim të gjitha të ardhurat që do të përfitojë, pasi lojtari ka ardhur nga akademia e klubit, dhe marrëveshja nuk do të ndikohet nga asnjë lloj rregulli për Fair Play-in financiar. Kontrata e Gallagher gjithashtu mund të jetë një tjetër faktor që favorizon një transferim të mundshëm. Marrëveshja aktuale e lojtarit me klubin skadon në verën e vitit 2025. Kjo do të thotë se Chelsea mund të rrezikojë ta humbasë me kosto zero lojtarin, që do të ishte një humbje e madhe për blutë e Londrës.
Për më shumë, në rast se Conor largohet, kjo nuk do të ishte hera e parë që Chelsea ka shitur një nga lojtarët e vet tek klubet rivale në Premier League. Mason Mount iu bashkua Manchester United verën e kaluar, ndërkohë që Kai Havertz iu bashkua Arsenal. Përsa i përket dëshirës së Gallagher, mesfushori ka bërë me dije se ende kërkon të jetë pjesë e Chelsea, por kjo mund të ndryshojë nga ecuria e klubit.
