Bomberi i Napoli, Victor Osimhen, është i hapur për një transferim të mundshëm tek Chelsea. Megjithatë, klubi londinez mund të jetë i detyruar të presë verën e ardhshme për të bërë një lëvizje për sulmuesin. Lojtari ka përshkruar Didier Drogba, ish-yllin e Chelsea, si një nga idhujt e tij në futboll, dhe Osimhen gjithashtu është i intriguar nga ideja e të luajturit futboll në Premier League.
Presidenti i Napoli, Aurelio De Laurentiis, njihet si një negociues mjaft i vështirë dhe italiani e vlerëson kartonin e Osimhen në shifrat e 100 milionë paundëve. Kjo është një nga arsyet se përse një largim në janar ka shumë pak gjasa të ndodhë. Napoli gjithashtu po kalon një sezon të vështirë krahasuar me atë të kaluar, kur u shpallën kampionë. Ekipi është në garë për një vend në Champions League, dhe Osimhen është një lojtar mjaft i rëndësishëm për të arritur këtë objektiv.
Chelsea ndërkohë ende nuk ka vendosur nëse do të hidhet në sulm për një sulmues në janar. Drejtuesit e bluve të Londrës pritet të bien dakord për planin në fund të dhjetorit, dhe shumë gjëra do të varen nga forma e sulmuesëve që Chelsea ka momentalisht në dispozicion. Bëhet fjalë për Nicolas Jackson, Christopher Nkunku dhe Armando Broja.
Jackson shënoi një tripletë ndaj Tottenham, si dhe një gol ndaj Manchester City, dhe duket se po fillon të gjejë dalëngadalë formën e tij më të mirë. Nkunku nga ana tjetër pritet të rikthehet shumë shpejt pas dëmtimit të marrë në fillim të sezonit. Broja ndërkohë gjithashtu ka patur luhatje me dëmtimet së fundmi, dhe nuk ka bindur plotësisht me nivelin e paraqitur në fushën e blertë. E sigurt është se nëse Osimhen zbarkon një ditë në Stamford Bridge, ai do të jetë titullar në ekipin e Pochettino.
