Rasmus Hojlund është blerja më e re e Manchester United, dhe pritshmëritë për sulmuesin danez janë të larta në Old Trafford. Por si ka evoluar karriera e Hojlund dhe çfarë mund të pritet prej tij në sezonin e parë në Premier League?
Hojlund startoi karrierën e tij si profesionist me Copenhagen në vitin 2020, kur ishte vetëm 17 vjeç. Megjithatë, lojtari pati një periudhë të vështirë në kampionatin danez, teksa dështoi të gjente rrugën e rrjetës në 19 paraqitje. Megjithatë, duhet theksuar se Hojlund u aktivizua si titullar në vetëm 2 prej këtyre sfidave. Në vitin 2022 futbollisti u largua nga Copenhagen për të nisur një aventurë të re tek Sturm Graz në Austri, atje ku dhe karriera e tij mori shtysën kryesore.
Në gjysmën e dytë të sezonit 2021-2022, Rasmus shënoi 9 gola në 17 ndeshje me klubin austriak. Sulmuesi ra në sy për të majtën e mprehtë përpara portës, forcën fizike, si dhe zgjuarsinë në lëvizje gjatë ndërtimit të aksioneve. Forma e tij e mirë bëri që Atalanta në Serie A të shprehte interes për të dhe sulmuesi eventualisht iu bashkua klubit italian. Sezonin që lamë pas Hojlund shënoi 20 gola me Atalantën dhe kombëtaren daneze, në 47 paraqitje gjithsej. Në mars, sulmuesi ra në sy gjatë kualifikueseve të Euro 2024, ku shënoi 5 gola në 2 ndeshje me Danimarkën, përfshirë këtu një tripletë ndaj Finlandës.
Fansat dhe opinioni sportive kanë nisur të krahasojnë Hojlund me bomberin e Manchester City, Erling Haaland. Kjo për shkak të ngjashmërive fizike, pozicionit ku luajnë, si dhe rivalitetit legjendar mes 2 klubeve ku lojtarët aktivizohen. Megjithëse Rasmus është ende shumë larg statistikave të Haaland me Manchester City, të dy sulmuesit janë ende në startin e karrierës së tyre. Kjo do të thotë se në të ardhmen, nuk përjashtohet një rivalitet i zjarrtë mes 2 sulmuesve në Premier League.