Spanjollët e Real Madrid më në fund kanë hedhur hapa konkretë, në lidhje me dëshirën e tyre për të sjellë në Madrid, Kylian Mbappe. Galaktikët kanë ofruar zyrtarisht, plot 137 milionë paundë për të marrë shërbimet e sulmuesit francez. Fituesi i Kupës së Botës 2018 me “gjelat” u bë pjesë e PSG në vitin 2017, dhe kontrata e tij me parizienët skadon në qershor të vitit të ardhshëm.
Real Madrid, që sipas raportimeve mësohet se gjendet në vështirësi financiare, ka firmosur vetëm me David Alaba këtë merkato vere. Mbrojtësi erdhi nga Bayern Munich me parametra zero dhe tani duket se e gjitha ka qenë pjesë e strategjisë së madrilenëve, për të kursyer fondet e nevojshme për transferimin e Mbappe.
Një tjetër faktor që i ka lehtësuar spanjollët në aspektin financiar janë largimet e Sergio Ramos dhe Raphael Varane. 2 mbrojtësit ishin nga lojtarët me pagat më të larta në klub, dhe transferimi i tyre drejt PSG dhe Manchester United, sigurisht që ka sjellë frymëmarrje për Florentino Pérez.
Paris St-Germain ndërkohë ende nuk i është përgjigjur ofertës, por shumë analistë sportivë në mediat franceze e shohin atë si shumë të mirë për t’u refuzuar. Sipas Robin Bairner do të ishte e pazakontë dhe e vështirë për t’u kuptuar, nëse PSG do të refuzonte një ofertë kaq të majme, për një lojtar që mund të largohet me parametra zero vitin e ardhshëm.
Bairnet gjithashtu shtoi se për pronarët nga Katari që zotërojnë klubin francez, çështja e transferimit të Mbappe ka të bëjë me prestigjin. Al-Khelaifi e di mirë se sulmuesi 22 vjeçar është nga asetet e tij më të çmuara, dhe paratë kalojnë në plan të dytë.
Gjithsesi, qëndrimi i PSG duket se është zbutur disi në lidhje me fatin e Mbappe, kjo të paktën në prapaskenë. Sipas mediave lokale, klubi ende nuk ka ndërmend të heqë dorë nga shërbimet e lojtarit, por po monitoron nga afër të gjitha ofertat dhe zhvillimet e fundit nga klubet europiane, që janë në garë për kartonin e futbollistit.
