Real Madrid është në krye të garës për të siguruar shërbimet e talentit të Manchester City, Bernardo Silva. Portugezi 29 vjecar ka një klauzolë prej 50 milionë paundësh për prishjen e kontratës, një shifër që ka ngjallur interesin e shumë klubeve europiane, përfshirë këtu Barcelona, PSG, Bayern Munich dhe Arsenal.
Në rast se Silva vendos të largohet nga City në merkaton e verës, mesfushori preferon Spanjën si destinacionin e tij të rradhës. Duke qënë se Barcelona e ka mjaft të vështirë të sigurojë financat e nevojshme për të sjellë Silva në Camp Nou, dera është e hapur që Real Madrid të përfitojë.
Në Bernabeu, portugezi shihet si një lojtar perfekt për trajnerin Ancelotti. Tashmë që karriera e Luka Modric dhe Toni Kroos në Madrid është drejt fundit, madrilenët kanë nevojë për më shumë eksperiencë në mesfushë. Silva duket kandidati perfekt, teksa lojtari ka fituar 5 herë titullin e Premier League me Manchester City, dhe gjithashtu ka triumfuar në Champions League dhe FA Cup.
Momentalisht lojtari ndihet i lumtur tek City, por sipas mediave angleze, mundësia e largimit të tij nuk mund të përjashtohet. Një situatë e ngjashme ndodhi dhe gjatë sezonit të kaluar, teksa Bernardo u përfol për një largim të mundshëm drejt Barcelona, por eventualisht, portugezi vendosi të qëndrojë në Etihad.
Silva humbi një penallti mjaft të rëndësishme në humbjen e Manchester City përballë Real Madrid në Champions League. Megjithatë, lojtari i dhuroi skuadrës së tij fitoren në ndeshjen përballë Chelsea në FA Cup. “Qytetarët” fituan me rezultatin 1-0 dhe do të luajnë tashmë në finalen e kompeticionit.
Ndërkohë, pavarësisht penalltisë së humbur ndaj Real, Silva ka zhvilluar paraqitje fantastike përballë spanjollëve, në 3 sezonet e fundit në Champions League ku City është përballur me ekipin e Ancelotti. Kjo është një tjetër arsye se përse drejtuesit e “Los Blancos” janë të bindur në aftësitë e portugezit.
