Sulmuesi i Real Madrid, Vinicius Junior, i është përgjigjur kritikave për festimin e tij tradicional të golit. Gjatë një diskutimi në një televizion spanjoll, agjenti sportiv, Pedro Bravo, tha se në Spanjë rivalët duhet të respektohen dhe nuk duhet të kërcesh si një majmun. Kuptohet se deklarata e Bravo mori një lumë kritikash dhe u konsiderua raciste nga opinioni sportiv. Agjenti kërkoi më pas falje në Twitter, duke thënë se deklarta e tij u keqkuptua, por Vinicius iu përgjigj spanjollit.
Braziliani tha:
“Pranojeni, respektojeni. Në çfarëdolloj rasti, unë nuk do të ndalem! Përpara disa javësh, disa persona filluan të kritikojnë kërcimin tim. Por ai nuk është vetëm i imi. Kërcimet i përkasin dhe Ronaldinho, Neymar, Paqueta, Griezmann, Joao Felix, Matheus Cunha, këngëtarëve brazilianë të rrymës funk, kërcimëtarëve samba, këngëtarëve latinë dhe afro-amerikanëve. Janë kërcime për të festuar diversitetin e kulturave në botë.”
Vinicius shtoi:
“Ata thonë se kjo lumturi i bezdis. Mbi të gjitha i bezdis lumtura e një braziliani me ngjyrë që është i suksesshëm në Europë. Por vullneti im për të fituar, buzëqeshja ime dhe shkëlqimi në sytë e mi janë shumë më të fortë.”
Sulmuesi i galaktikëve ka marrë mesazhe mbështetjeje nga shumë lojtarë të tjerë dhe personalitete të shquara të futbollit. Shoku i tij i skuadrës tek kombëtarja braziliane, Neymar, ka postuar në rrjetet e tij sociale një foto të tij dhe Vinicius duke kërcyer. Në mbështetje të Vinicius ishte dhe legjenda e futbollit botëror, braziliani Pele, 3 herë fitues i Kupës së Botës. 81 vjeçari u shpreh:
“Futbolli është një gëzim. Është një kërcim. Është një festë e vërtetë. Megjithëse racizmi ende ekziston, ne nuk do ta lejojmë këtë gjë që të na ndalojë të buzëqeshim.”
Real Madrid gjithashtu nxori një deklaratë zyrtare në mbështetje të yllit të tyre brazilian.
