Sipas raportimeve më të fundit të “The Sun”, Romelu Lukaku është shprehur se nuk ndihet i lumtur tek Chelsea, dhe mund të largohet drejt rivalëve të Tottenham. 28 vjeçari shkaktoi mjaft reagime në rrjet, pas intervistës së tij të fundit, ku deklaroi se nuk dëshironte që të largohej nga Inter në verë.
Sulmuesi belg u la jashtë nga trajneri Thomas Tuchel, në barazimin emocionues 2-2 në shtëpi ndaj Liverpool, ditën e diel. Burime jo zyrtare bëjnë me dije se Lukaku është takuar me trajnerin e Chelsea, për të vendosur përfundimisht mbi të ardhmen e tij. Prestigjozja “La Gazzetta dello Sport” bën me dije se ish-trajneri i tij tek Interi, Antonio Conte, mund të heqë dorë nga ndjekja e Dusan Vlahovic të Fiorentinës, pasi tashmë ka shanse të nënshkruajë me Lukakun.
Para ndeshjes të së dielës, Tuchel tha se e kishte lënë jashtë skuadrës 28-vjeçarin për të “mos cënuar përgatitjen” e një ndeshjeje, kundër një skuadre që ndodhet vetëm 1 pikë prapa tyre në Premier League.
Ndërsa pas ndeshjes, trajneri gjerman tha për Sky Sports:
“Ai është lojtari ynë, ka gjithmonë një rrugë kthimi. Ne do ta sqarojmë këtë gjë me dyer të mbyllura, dhe pasi të kemi marrë një vendim dhe Romelu ta dijë, ndoshta do ta mësoni edhe ju. Kjo nuk është për t’u diskutuar në këto momente.”
Lukaku ka shënuar shtatë gola në 18 paraqitje me londinezët, që kur iu bashkua atyre nga Inter Milan, për shifrën rekord të 97.5 milionë paundëve në verë. Ai gjithashtu është kufizuar nga dëmtimet dhe nganjëherë e ka gjetur veten të lënë jashtë formacionit fillestar, edhe kur ka qënë në gjendje të mirë fizike. Megjithatë, ai ka pasur një përmirësim në formë, duke shënuar në dy paraqitjet e tij të fundit në Premier League, pas diskutimeve me Tuchel, për rolin e tij në fushë.