Trajneri i Anglisë, Gareth Southgate, ka rrëfyer se ishte gati të hiqte dorë nga drejtimi i Anglisë pas eleminimit nga Franca në Kupën e Botës. “3 Luanët” u eleminuan në çerekfinalet e Katarit, duke zhgënjyer dhe një herë tjetër tifozët e tyre. Gjithsesi, Southgate vendosi të qëndrojë në krye të kombëtares, dhe mesa duket, tekniku është menduar gjatë për të arritur në këtë përfundim. Në një intervistë të fundit për BBC Sport ai u shpreh:
“Nuk kam dashur asnjëherë të jem në një pozicion ku prezenca ime ndikon negativisht tek skuadra. Nuk mendoja se kjo po ndodhte, por mu desh një periudhë reflektimi pas Kupës së Botës për të reflektuar dhe për t’u siguruar se si ndihesha. Pyeta veten time, a është gjëja e duhur të vazhdoj këtë projekt? Doja të sigurohesha se jam ende i uritur për këtë sfidë.”
Southgate e ka cilësuar rolin e trajnerit të Anglisë si privilegjin më të madh të jetës së tij. Pavarësisht se tekniku mendoi dhe largimin nga drejtimi i kombëtares, Gareth u shpreh përfundimisht se vendimi për të qëndruar në krye të stolit ishte jo i vështirë për t’u marrë, duke marrë parasysh kualitetin e skuadrës dhe progresin e bërë. Anglezi shtoi:
“Skuadra është ende duke u përmirësuar. Të gjithë po fitojmë besim tek ajo që po bëjmë.”
I vetmi shqetësim i teknikut mbi detyrën e tij, ishte se narativa e mediave sportive do të ndikonte negativisht tek grupi i lojtarëve. Por mesa duket Anglia e ka mbyllur tashmë këtë kapitull dhe lojtarët janë të përqëndruar tek e ardhmja.
Southgate u shpreh se ekipi i tij është padyshim kompetitiv përballë të gjitha skuadrave të tjera në botë. Tekniku gjithashtu tha se është mjaft konfident për shanset e “3 Luanëve” në Europianin e vitit të ardhshëm në Gjermani.