Antonio Conte firmosi një kontratë për 1 vit e gjysmë me Tottenham, por intervista e tij e fundit për Sky Sport Italia hodhi dyshime të forta se italiani mund të largohet më shpejt nga klubi londinez. Gjatë intervistës, tekniku vuri në dyshim ambicien e drejtuesëve të Tottenham për të ecur para, duke thënë se skuadra u dobësua në merkaton e janarit nga vendimet e bordit.
Londinezët firmosën me Dejan Kulusevski dhe Rodrigo Bentancur, të dy lojtarë të Juventus. Por Conte mesa duket ka pritur investime më të mëdha nga drejtuesit e klubit. Sipas raportimeve në Angli, këta të fundit janë të surprizuar me deklaratat e italianit, por të gjithë ata që e kanë ndjekur karrierën e Conte e dinë se kjo nuk është një gjë e re për të.
Ka pasur disa raste kur Antonio ka zgjedhur të largohet nga drejtimi i një ekipi, kur ka vënë re se drejtuesit e tij nuk janë në një linjë me të, apo nuk kanë të njejtat ambicie. Në 2014 Antonio Conte u largua nga drejtimi i Juventus vetëm 1 ditë pas startit të ndeshjeve para-sezonale. Ai nuk ishte i bindur për planet e klubit si dhe nuk shihte mundësi për përmirësim. Gjithashtu, trajneri u zhgënjye nga fakti që bordi nuk arriti të sjellë në skuadër Juan Cuadradon nga Fiorentina. Ky i fundit do t’i bashkohej klubit pas largimit të Contes si trajner.
Italiani shprehu pakënaqësi dhe ndaj Inter, kur ishte në krye të pankinës së zikaltërve. Ai u shpreh në prill:
“Unë kam ndikim vetëm tek e tashmja. Programet e klubit kanë ndryshuar dhe më duhet qartësi në fund të sezonit. Na duhet një projekt i qartë pasi fansat e meritojnë.”
Duke u nisur nga situata e vështirë e Tottenham si dhe nga karakteri atipik i trajnerit italian, nuk është çudi që Conte të largohet nga klubi anglez përpara përfundimit të kontratës.
