Harry Kane ka ende shpresë për të realizuar një lëvizje drejt Manchester United këtë merkato vere. Sulmuesi anglez mbetet nën shënjestrën e “Djajëve të Kuq”, teksa trajneri Erik ten Hag është në kërkim të një sulmuesi qëndror. United ende nuk ka gjetur zëvëndësuesin e Cristiano Ronaldo, ndërkohë që kontrata e të huazuarit Wout Weghorst gjithashtu është në përfundim.
Kane nga ana tjetër ka vetëm 1 vit kontrate aktive me Tottenham, fakt që mund të favorizojë një lëvizje këtë merkato. Sidomos duke marrë parasysh faktin se klubi nuk do të luajë në Europë sezonin e ardhshëm. Megjithatë, duket se drejtuesit e Manchester United e kanë humbur disi interesin tek anglezi, pas kërkesave të presidentit të Tottenham, Daniel Levy, të cilat janë konsideruar jo realiste.
Levy ende kërkon 100 milionë paundë për kartonin e Kane, që konsiderohet një shumë e lartë duke marrë parasysh dhe moshën e lojtarit. Për më shumë, presidenti i Tottenham është skeptik për të shitur lojtarin tek një ekip rival në Premier League. Kjo ishte dhe një nga arsyet e refuzimit të ofertës së Manchester City para 2 vitesh.
Nisur nga kjo situate, United është duke kërkuar për alternativa të tjera dhe mes emrave janë Rasmus Hojlund i Atalanta dhe francezi Randal Kolo Muani i Eintracht Frankfurt. Megjithatë, Kane ende nuk është dorëzuar nga objektivi i transferimit tek një klub ku mund të fitojë trofe. Real Madrid gjithashtu pati shprehur interes për anglezin, por spanjollët nuk janë më të interesuar, pas afrimit të Jude Bellingham, si dhe mundësisë për të firmosur me Kylian Mbappe vitin tjetër.
Kane ndërkohë ia doli të shënojë plot 30 gola gjatë sezonit që lamë pas në Premier League. Vetëm Erling Haaland i Manchester City ia doli të shënojë më shumë sesa bomberi i Tottenham gjatë këtij sezoni.