Tottenham ka piketuar Julian Nagelsmann si alternativën e parë, për të zëvëndësuar trajnerin Antonio Conte, në momentin kur italiani të largohet nga klubi. Nagelsmann u shkarkua në mënyrë surprizë nga Bayern Munich ndërkohë që në Londër, italiani Conte ka humbur besimin e drejtuesëve të klubit dhe mendohet se do të shkarkohet shumë shpejt.
Tottenham u përpoq të firmoste me Nagelsmann që në verën e vitit 2021, pas shkarkimit të Jose Mourinho, por tekniku gjerman iu bashkua Bayern Munich. Gjithsesi, presidenti i Tottenham, Daniel Levy, mbetet një admirues i madh i Nagelsmann, dhe sipas burimeve të Football Insider, po punon për të sjellë gjermanin në Londër.
Nga burime të afërta pranë Nagelsmann, thuhet se gjermanit i pëlqen ideja e drejtimit të një klubi në Premier League, dhe kjo rrit akoma më shumë shanset e Tottenham për të bindur ish-trajnerin e Leipzig.
Besohet se nëse Julian bie dakord me Tottenham për termat e kontratës, ai do të vendoset në krye të ekipit duke nisur nga sezoni i ardhshëm, dhe jo në këto momente. Gjithsesi, klubi londinez gjithashtu ka menduar për alternativa të tjera, në rast se plani A nuk realizohet. Mes kandidatëve të tjerë për pankinën e Spurs janë dhe ish-trajneri Mauricio Pochettino, si dhe Luis Enrique.
Ndërkohë Antonio Conte ende nuk është kthyer në Angli, teksa tekniku ndodhet në Itali me pushime. Mes lojtarëve të Tottenham dhe stafit pritet që italiani të shkarkohet, por Spursat ende nuk kanë konkretizuar asnjë lëvizje. Asistentët Ryan Mason dhe Cristian Stellini kanë marrë përkohësisht detyrën, por nga presidenti Daniel Levy pritet më shumë qartësi mbi të ardhmen e klubit, dhe presioni është në rritje. Ky i fundit mendohet se po shfrytëzon periudhën e ndeshjeve të kombëtareve, për të marrë një vendim përfundimtar mbi Conte dhe zëvëndësuesin e tij.
