Agjenti i Victor Osimhen, Roberto Calenda, ka kërcënuar klubin e Napolit me aksione ligjore, pas postimit të fundit të italianëve në rrjetet sociale. Drejtuesit e klubit postuan një video humoristike e cila kishte në qendër, vet sulmuesin e tyre Osimhen. Në video dëgjohet një zë i lartë qesharak që thotë “më jepni penallti ju lutem” dhe shihet nigeriani i cili humbet një goditje nga pika e bardhë. Postimi u fshi nga drejtuesit e rrjeteve sociale të Napoli, por duket se incidenti nuk do të kalojë kaq lehtë.
Agjenti i Osimhen, Roberto Calenda, u shpreh në rrjetin social X:
“Ne kemi të drejtën të ndërmarrim hapa ligjorë për të mbrojtur Osimhen. Ajo që ndodhi sot në profilin zyrtar të Napoli në platformën TikTok është e papranueshme. Një video ku Osimhen tallet u bë publike, dhe tani u fshi. Kjo është një gjë që shkakton dëm serioz tek lojtari, në një periudhë që djaloshi po vuan nga gjyqet mediatike dhe lajmet fallco.”
Osimhen u pa i nervozuar me trajnerin e Napoli, Rudi Garcia, kur ky i fundit vendosi të zëvëndësojë sulmuesin në minutën e 86 të takimit, në sfidën ndaj Bologna. Ndeshja u mbyll në barazim pa gola. Ndërkohë më vonë, trajneri Garcia u shpreh se ka sqaruar situatën me sulmuesin në dhomat e zhveshjes, dhe nuk ka asnjë mosmarrëveshje apo problem serioz mes tyre.
Superstari i Napoli ishte një nga emrat më të përfolur në merkaton e verës, pavarësisht faktit se në fund vendosi të qëndrojë në Itali. Manchester United dhe Chelsea ishin dy klubet më të linkuara me emrin e tij, dhe interesi i ekipeve angleze pritet të jetë i njejtë edhe në merkaton e ardhshme. Mbetet të shohim nëse pakënaqësitë e Osimhen, do të ndikojnë për të vendosur largimin e mundshëm të tij nga kampionët në fuqi të Serie A.
