Sipas raportimeve më të fundit të mediave angleze, Leicester City ka refuzuar një tjetër ofertë të Chelsea, për mbrojtësin Wesley Fofana. Blutë e Londrës mendohet se kanë ofruar 60-70 milionë paundë për lojtarin, shifër kjo që është konsideruar e ulët nga drejtuesit e Leicester. Për këtë arsye, “dhelprat” janë treguar përsëri stoikë në qëndrimin e tyre për francezin.
Që Tuchel të sjellë mbrojtësin në Stamford Bridge, mund të jetë e nevojshme një shifër rekord prej më shumë se 80 milionë paundë. Londinezët kanë shpenzuar 170 milionë paundë deri më tani në këtë merkato vere. Së fundmi, ata u përballën dhe me refuzimin e Everton, për kartonin e sulmuesit Anthony Gordon. Paralelisht, Chelsea është gjithashtu i interesuar për sulmuesin e Barcelonës, Pierre-Emerick Aubameyang.
Ndërkohë përsa i përket Fofana, ky i fundit u la jashtë skuadrës së Leicester, në humbjen e “dhelprave” përballë Southampton ditën e shtunë. Trajneri i ekipit, Brendan Rodgers, u shpreh se Fofana nuk ishte në gjendjen e duhur mendore për t’u aktivizuar, por nuk komentoi në detaje mbi të ardhmen e qendër-mbrojtësit.
Lojtari iu bashkua Leicester City në vitin 2020 nga francezët e St Etienne. Paraqitjet e tij të mira i kanë dhuruar një vend në kombëtaren U21 të Francës, ndërkohë që para pak muajsh, Fofana firmosi një kontratë të re me Leicester. Sipas marrëveshjes së re, mbrojtësi do të luajë në King Power Stadium dhe për 5 vitet e ardhshme.
Këtë fundjavë, Leicester përballet me Chelsea në Premier League, dhe është ende e paqartë nëse Fofana do të jetë pjesë e 11-shes titullare të “dhelprave”. Nëse francezi aktivizohet, ky do të ishte një mesazh i qartë për Chelsea, që duhet të shikojë opsione të tjera për të përforcuar repartin e mbrojtjes. Pas humbjes 3-0 ndaj Leeds në kampionat, Tuchel e ka gjithnjë e më të qartë rëndësinë e një qendër-mbrojtësi solid në ekipin e tij.