Antonio Rudiger është lojtari më i ri që i bashkohet kampionëve spanjollë të Real Madrid. Mbrojtësi gjerman ka firmosur një kontratë 4 vjeçare me Los Blancos, pas refuzimit së fundmi të disa ofertave për rinovim nga ana e Chelsea. Kartoni i lojtarit nuk i ka kushtuar Real Madrid, duke qënë se Rudiger përmbylli kontratën me blutë e Londrës, duke u larguar kështu me kosto zero nga Stamford Bridge.
Përpara zyrtarizimit të lëvizjes, Rudiger iu ofrua një marrëveshje prej 200,000 paundësh në javë për të qëndruar tek Chelsea. Nga ana tjetër, Bayern Munich gjithashtu zhvilloi bisedime me përfaqësuesit e lojtarit, por në fund ai vendosi të zgjedhë 14 herë kampionët e Europës si destinacionin e tij të ardhshëm.
Largimi i Rudiger ishte diçka e pritshme, teksa vet trajneri Thomas Tuchel deklaroi para 1 muaji:
“Kemi bërë gjithçka që kemi mundur por tani hyjmë në një situatë ku gjërat nuk varen nga ne, për shkak dhe të sanksioneve, dhe Toni do të largohet.”
Klubi anglez gjithashtu do të humbasë Andreas Christensen me kosto zero këtë verë. Ky i fundit pritet t’i bashkohet Barcelonës. Lajm pozitiv është fakti se kapiteni Cesar Azpilicueta sipas të gjitha gjasave do të qëndrojë në klub të paktën dhe për 1 vit shtesë.
Real Madrid ndërkohë ka bërë publik afrimin e Antonio Rudiger dhe ka deklaruar se ceremonia e prezantimit të lojtarit përpara fansave do të zhvillohet në 20 qershor. Vet Rudiger është shprehur mjaft i lumtur për hapin e rradhës në karrierën e tij. Në një postim në Twitter, gjermani u shpreh:
“Jam krenar të deklaroj se do t’i bashkohem Real Madrid. Jam shumë i emocionuar për të gjitha sfidat që më presin dhe mezi po pres të luaj ndeshjet e mia të para për këtë klub të madh. #HalaMadrid”
