Romelu Lukaku është rikthyer zyrtarisht tek Inter, vetëm 1 vit pasi la italianët për t’iu bashkuar Chelsea. Sulmuesi belg ka firmosur një kontratë në formë huazimi për 1 sezon të vetëm me zikaltërit. Klubi italian do t’i paguajë bluve të Londrës 8 milionë euro për shërbimet e lojtarit, teksa mësohet se Lukaku ka pranuar një ulje rroge për të bërë të mundur lëvizjen. Situata financiare e Inter e bënte të pamundur që bomberit t’i ofrohej një pagë e ngjashme si ajo në Premier League, apo të realizohej blerja e plotë e kartonit të tij.
Lukaku u shpreh mjaft i lumtur për rikthimin e tij tek Inter. Në një intervistë për kanalin zyrtar të klubit ai deklaroi:
“Inter më ka dhënë kaq shumë dhe shpresoj të performoj akoma më mirë se më parë. Kur shkova në Angli nuk e braktisa shtëpinë time këtu, dhe kjo tregon se sa i lumtur jam që po kthehem përsëri.”
Belgu gjithashtu u pyet për arsyen që e bindi të rikthehej në Milano. Lojtari u përgjigj:
“Afeksioni i fansave dhe i shokëve të mi të skuadrës, por dhe mundësia për të punuar me trajnerin. Kam qëndruar në kontakt me të gjatë gjithë sezonit.”
Vitin e kaluar Lukaku la Inter për t’iu bashkuar Chelsea duke lidhur një kontratë 5 vjeçare me blutë e Londrës. Dëmtimet dhe performancat jashtë pritshmërive për të bënë që Lukaku të humbasë vendin e titullarit në ekipin e Thomas Tuchel. Në një intervistë për Sky Sport Italia sulmuesi shprehu hapur pakënaqësitë e tij për situatën në Stamford Bridge, dhe tha se nuk ishte i lumtur me rolin e tij në Londër.
Ajo intervistë shërbeu si krisja finale mes Lukaku dhe Chelsea-it të Tuchel, që pavarësisht se ende zotëron kartonin e sulmuesit, duket se nuk e sheh më atë në planet e së ardhmes.