Polonia, padyshim nuk është një nga kombëtaret favorite për të fituar Euro 2020. Por kjo nuk do të thotë se Robert Lewandowski, makineria e golave për Bayern Munich, nuk mund të rrëmbejë titullin e “Këpucës së Artë” këtë verë.
Për të mbështetur këtë ide, mjafton të shikojmë statistikat e bomberit gjatë sezonit që sapo lamë pas. Lewandowski arriti të shënonte më shumë gola se çdo lojtar tjetër në 5 kampionatet “big” të Europës gjatë këtij viti. Sulmuesi i Bayern Munich arriti të shënonte plot 48 gola në 41 ndeshje, duke përfshirë këtu një shifër rekord prej 41 realizimesh në 29 ndeshje të Bundesliga. Kjo shifër përkthehet në 1 gol çdo 60 minuta të një ndeshje në kampionat.
Në qoftë se Lewandowski ruan të njejtin ritëm realizimesh dhe në Europian, kjo do të përkthehej në të paktën 4 gola gjatë 3 ndeshjeve në grup të Polonisë. Kombëtarja e sulmuesit ndodhet në një grup me Suedinë, Sllovakinë dhe Spanjën, ku sipas parashikimeve në letër, vetëm këta të fundit mund t’i hapin telashe Polonisë së Lewandowskit.
32 vjeçari sigurisht do të ketë mundësinë të shënojë akoma më shumë gola nëse kombëtarja e tij kalon fazën e grupeve, gjë që ka shumë mundësi të ndodhë. Por, ka dhe zëra që shprehen skeptikë për ecurinë e sulmuesit në Europian. Sipas tyre, Lewandowski nuk ka te Polonia, mbështetjen nga krahët dhe mesfusha që ka te Bayern Munich. Ndonëse kjo mund të jetë e vërtetë, statistikat e tanishme të lojtarit me kombëtaren e tij janë mëse të kënaqshme.
Kapiteni i Polonisë u bë lojtari i parë në histori që shënoi plot 16 gola, në një fazë kualifikuesesh për Kupën e Botës. Bomberi gjithashtu shënoi 6 gola në 10 takimet kualifikuese për Euro 2020. Kjo do të thotë se Lewandowski ka çdo gjë në ADN-në e tij, për të rrëmbyer “Këpucën e Artë” të Europianit.