Drejtuesit e Crystal Palace kanë vendosur çmimin për të gjitha ekipet që interesohen në shërbimet e Eberechi Eze dhe Michael Olise. Palace e ka shmangur rrezikun e rënies nga kategoria, dhe klubi nuk është i detyruar të shesë asnjë lojtar. Megjithatë, duke parë paraqitjet mjaft të mira të Eze dhe Olise në javët e fundit, ofertat nuk pritet të mungojnë në merkaton e verës, dhe drejtuesit e Palace duan të përfitojnë sa më shumë nga ana financiare.
Drejtuesit e klubit kërkonë minimalisht 60 milionë paundë për secilin prej lojtarëve. Si Olise, ashtu dhe Eze nënshkruan kontrata të reja afatgjata me Crystal Palace këtë sezon, dhe kjo do të thotë se klubi ndodhet në pozita të mira për të negociuar me palët e interesuara.
Verën e kaluar Eze ishte në radarin e Manchester City, megjithatë, ekipi i Pep Guardiola vendosi të firmosë me talentin e Wolves, Matheus Nunes. Ndërkohë përsa i përket Olise, ky i fundit ishte në listën e objektivave të Chelsea po merkaton e kaluar verore. Blutë e Londrës tentuan të rrëmbenin lojtarin duke bërë një ofertë prej 35 milionë paundësh, por pa sukses.
Si Eze, ashtu dhe Michael Olise duket se janë të lumtur tek Crystal Palace. Sipas burimeve të brendshme pranë Crystal Palace, të dy lojtarët mund të largohen vetëm nëse janë të bindur se lëvizja është me benefit për ta, dhe mund të luajnë në një ekip ku kanë hapësirën e duhur për të shfaqur qartë talentin e tyre.
Ndërkohë, një tjetër lojtar i Crystal Palace që mund të jetë në vëmendjen e klubeve rivale këtë verë, është dhe Marc Guehi. Mbrojtësi është pjesë e Palace që prej vitit 2021 dhe ka zhvilluar paraqitje mjaft konsistente këtë sezon. Guehi ka një shanc real për të qënë pjesë e kombëtares angleze në europianin që do të zhvillohet në verë, një tjetër mundësi që lojtari të dëshmojë kualitetin e tij.